रावेत, ता.११ : रूणाल गेटवे रो-हाऊस सोसायटी शेजारी असलेल्या महानगरपालिकेच्या उद्यानात मोठ्या प्रमाणात गवत वाढले. तेथून वारंवार नाग, साप आणि इतर सरपटणारे प्राणी आढळून येत असून ते सोसायटी परिसरात येत आहे. त्यामुळे सोसायटी परिसरात भीतीचे वातावरण निर्माण झाले आहे.
या उद्यानाची नियमित निगा राखली जात नसल्याने गवताचे प्रमाण दिवसेंदिवस वाढत आहे. त्यामुळे सापांना आसरा मिळत आहे. काही दिवसांपूर्वीच एका रहिवाशाच्या अंगणात नाग दिसल्याची घटना घडली. या प्रकारामुळे सकाळ- संध्याकाळ फेरफटका मारण्यासाठी किंवा व्यायामासाठी येणाऱ्या नागरिकांना धोका निर्माण झाला आहे. लहान मुले खेळत असताना पालकांना कायम भीती वाटते.

महानगरपालिकेच्या उद्यानातील गवत अतिशय वाढले असून परिसरात सर्प येण्याचे प्रमाण वाढले आहे. आम्ही अनेक वेळा महापालिकेच्या संबंधित विभागाकडे तक्रार केली. मात्र, अद्याप कोणतीही कार्यवाही झालेली नाही. महापालिकेने तातडीने गवत कापून परिसर स्वच्छ करावा, अशी आमची मागणी आहे.
- राजेंद्र मिरगल, स्थानिक नागरिक