रावेत, ता. २७ : मुकाई चौक ते म्हस्के वस्ती चौक आणि म्हस्के वस्ती ते चंद्रभागा कॉर्नर या मुख्य मार्गावर अनेक दिवसांपासून पथदिवे बंद आहेत. त्यामुळे अंधारात प्रवास करणे कठीण झाले आहे. या परिसरात वर्दळ मोठी असून, पथदिवे बंद राहिल्याने अपघात आणि चोरीचा धोका निर्माण झाला आहे.
रात्रीच्या वेळी या भागातून दुचाकी, चारचाकी तसेच पादचारी मोठ्या संख्येने जात असतात. मात्र, अंधार असल्याने वाहनचालकांना खड्डे दिसत नाहीत. काही वेळा भटके प्राणी अचानक समोर आल्याने अपघाताच्या घटना घडतात. भटके श्‍वान अंधाराचा फायदा घेत पादचाऱ्यांवर हल्ला करू शकतात, अशी भीती नागरिकांनी व्यक्त केली आहे.

स्थानिक रहिवासी दीपाली पाटील म्हणाल्या, ‘गरात्री कामावरून येताना हा रस्ता पार करणे धोकादायक ठरते. पथदिवे बंद असल्यामुळे अंधारात चालताना भीती वाटते. पालिकेने लक्ष देणे गरजेचे आहे.’’

वाहनचालक सागर मोरे म्हणाले, ‘‘म्हस्के वस्ती चौकात अंधार असल्याने रस्त्यावरील खड्डे आणि पदपथावरील अडथळे लक्षात येत नाहीत. काही दिवसांपूर्वी या भागात एका दुचाकीस्वाराचा अपघात झाला.’’