तळेगाव दाभाडे, ता. २ ः ठाकरवाडी, शिंदे वस्ती आणि सोमाटणे भागातील अनेक कुटुंबांना ३/२ प्रकरणांतर्गत कायदेशीर जमीनहक्क देण्याची प्रक्रिया सुरू झाली आहे. त्याने वन क्षेत्रात पिढ्यान पिढ्यापासून वास्तव्यास असलेल्या आदिवासी कुटुंबांना अखेर न्याय मिळाला आहे.
महसूल, वन विभाग, ग्रामपंचायत व प्रशासनाच्या संयुक्त प्रयत्नातून ३/२ प्रकरणांतर्गत कायदेशीर जमीनहक्क देण्याची प्रक्रिया राबविली जात असून त्यासाठी तहसीलदार विक्रम देशमुख, गटविकास अधिकारी कुलदीप प्रधान यांचे विशेष योगदान देत आहेत.
विठ्ठल शिंदे, आरएफओ प्रकाश शिंदे, सरपंच स्वाती कांबळे, सोनाली गायकवाड, प्रशांत भागवत, मंडल अधिकारी सलगर, ग्रामसेवक खोमणे व सोमाटणे ग्रामपंचायतीचे नितीन, विशाल व सचिन मुऱ्हे आदी यावेळी उपस्थित होते.
या ऐतिहासिक निर्णयामुळे अनेक ठाकर कुटुंबांचे स्वप्न साकार होणार आहे. त्यांना यापूर्वी जमिनीअभावी घरकुल, वीज, पाणी, रस्ते या मूलभूत सुविधा नाकारल्या जात होत्या. आता या कुटुंबांना अधिकृत जमिनीचे पट्टे मिळाल्याने त्यांचे जीवनमान उंचावणार आहे.

महसूल सप्ताहाची पुढील रूपरेषा
३ ऑगस्ट - शिवार रस्ते, वृक्षारोपण
४ ऑगस्ट - प्रमाणपत्र वाटप शिबिरे
५ ऑगस्ट - घरभेटी, अनुदान वितरण
६ ऑगस्ट - अतिक्रमण हटविणे
७ ऑगस्ट - कृत्रिम वाळू धोरण, समारोप