तळेगाव दाभाडे, ता. ४ : मावळातील मुंढावरे येथील गोळीबारप्रकरणी पोलिसांनी आठ जणांना अटक केली आहे. पैशांच्या वादातून एका वाहनचालकावर टोळक्याने हल्ला केला होता. त्यावर चालकाने स्वसंरक्षणासाठी हवेत गोळीबार केला. यात एका हल्लेखोराचा मृत्यू झाला. या प्रकरणी दोन स्वतंत्र गुन्ह्यांची नोंद करण्यात आली आहे.
गोळीबार प्रकरणात अशोककुमार मुनेश्वरसिंग (वय ६०) आणि हरीश सिंग (वय ५७, दोघेही रा. काळेवाडी, पिंपरी) या दोघांना अटक करण्यात आली आहे. न्यायालयाने त्यांना सात दिवसांची न्यायालयीन कोठडी सुनावली आहे. दरम्यान, हल्ला करून खुनाचा प्रयत्न करणाऱ्या सहा जणांनाही पोलिसांनी अटक केली आहे. त्यामध्ये आकाश उर्फ बंटी राजपूत (वय२३, रा. चिंचवड), रोहित मादळे (वय १९), ओंकार गायकवाड (२०), रोहित महादेव लोंढे (वय १९), सार्थिक पाडाळे (वय १९, सर्व रा. देहूगाव), रोहित सकडे (वय २१, रा. देहूरोड) यांच्यावर खुनाच्या प्रयत्नाचा गुन्हा दाखल आहे.
पोलिस निरीक्षक शंकर पाटील यांच्या मार्गदर्शनाखाली एका गुन्ह्याचा तपास सहायक पोलिस निरीक्षक सतीश पाटील करीत आहेत, तर दुसऱ्या गुन्ह्याचा तपास उपनिरीक्षक लोसलवार करत आहेत.