तळेगाव दाभाडे, ता. २४ ः शाळा चौक परिसरातील श्री विठ्ठल मंदिर संस्था यांच्या वतीने शुक्रवार (ता.२६) ते एक जानेवारी २०२६ या कालावधीत ‘श्री संत चरित्र कथा’ या धार्मिक सोहळ्याचे आयोजन करण्यात आले आहे.
या सोहळ्याचा आरंभ शुक्रवारी दुपारी चार वाजता गणेश भेगडे तसेच जालिंदर महाराज मोरे यांच्या उपस्थितीत कलश पूजनाने होणार आहे.
या सोहळ्यात प्रवचनकार संतोष महाराज काळोखे (देहूकर) संतांच्या जीवनचरित्रावर मार्गदर्शन करणार असून दररोज सायंकाळी पाच ते सात या वेळेत संतांच्या जीवनावर आधारित निरूपण होणार आहे. २६ व २७ डिसेंबर रोजी संताजी महाराज जगनाडे यांच्या जीवनचरित्राचे निरूपण होणार आहे. यावेळी दीपक भेगडे हे यजमान म्हणून कार्यरत राहणार आहेत. २८ व २९ डिसेंबर रोजी संत सेना महाराज यांच्या जीवनचरित्राचे निरूपण होणार आहे. यावेळी विनोद भेगडे व केदार भेगडे तर २९ डिसेंबर रोजी सोनाली दरेकर व शोभा परदेशी हे यजमान म्हणून कार्यरत राहणार आहेत. ३० व ३१ डिसेंबर रोजी संत चोखामेळा महाराज यांच्या जीवनचरित्राचे निरूपण होणार आहे. यावेळी पहिल्या दिवशी सत्यम खांडगे तर दुसऱ्या दिवशी मयूर टकले व सुहास गरुड हे यजमान म्हणून कार्यरत राहणार आहेत.
कार्यक्रमाला गणेश महाराज मोहिते, प्रदीप महाराज कुडेकर व ओंकार महाराज मोहिते हे संगीताची साथ देणार आहेत. कार्यक्रमाची सांगता गुरुवार (ता. १) जानेवारी रोजी सकाळी १० वाजता काळोखे यांच्या काल्याच्या कीर्तनाने होणार असून त्यानंतर महाप्रसादाचे आयोजन करण्यात आले आहे. या सोहळ्याची सांगता कै. कासाबाई भेगडे (पाटील) सभागृह येथे होणार आहे. कार्यक्रमाचा लाभ परिसरातील जास्तीत जास्त भाविकांनी घ्यावा, असे आवाहन संस्थेच्या वतीने करण्यात आले आहे.
मंदिर संस्थेचे विश्वस्त बाळकृष्ण आरडे महाराज, यतीन शहा, प्रशांत दाभाडे, श्यामराव भेगडे, शेखर गुंड, देवराम महाराज खराटे, हरिदास वनारसे व द्वारकादास थोरात हे सोहळ्याचे नियोजन करत आहेत.