तळेगाव स्टेशन, ता. २ : वराळे (ता. मावळ) आणि तळेगाव एमआयडीसी औद्योगिक क्षेत्रातून मोटारसायकली चोरी करणाऱ्या तिघाजणांच्या टोळीला तळेगाव एमआयडीसी पोलिस ठाण्याच्या पथकाने जेरबंद केले. त्यांच्याकडून गेल्या महिनाभरात चोरलेल्या तीन मोटारसायकली हस्तगत केल्या आहेत.
गेल्या १९ जुलैला बधालवाडी (ता. मावळ) हद्दीतील मार्क कॉट कंपनीसमोरील पार्किंगमधून मोटारसायकल चोरीस गेल्याप्रकरणी तळेगाव एमआयडीसी पोलिस ठाण्यात विनोद धनासज मेघावत (वय २४, संजय गांधी कॉलनी, पाषाण, पुणे) यांनी दिलेल्या फिर्यादीवरून २४ जुलैला गुन्हा दाखल करण्यात आला होता. त्यापूर्वी वराळे (ता. मावळ) येथील कल्पना सोसायटी परिसरातूनदेखील दोन मोटारसायकली चोरीप्रकरणी १० जुलैला तळेगाव एमआयडीसी पोलिस ठाण्यात गुन्हे दाखल होते.
वरिष्ठ पोलिस निरीक्षक रणजीत जाधव यांनी या गुन्ह्यांच्या अनुषंगाने तळेगाव एमआयडीसी पोलिस ठाण्याचे पोलिस उपनिरीक्षक विवेक गोवारकर, पोलिस हवालदार अनंत रावण, अंमलदार ज्ञानेश्वर सातकर, स्वराज साठे, रमेश घुले, विनायक शेरमाळे, भिमराव खिलारे यांची दोन पथके तैनात केली. तपास पथकांनी सीसीटीव्ही फुटेज तपासले असता एका मोटरसायकलवरून तिघेजण चोरी घडलेल्या ठिकाणी वारंवार ये-जा करत असल्याचे निष्पन्न झाले. या आधारे पोलिस पथकाने बुधवारी खेड तालुक्यातील म्हाळुंगे येथे सापळा रचून आरोपी सोहेल नवाज खान (वय २०, द्वाराका सिटी, म्हाळुंगे, ता. खेड, मूळ गाव रुद्रवाडी, ता. आळंद, जि. गुलबर्गा, कर्नाटक), संतोष अशोक अहिवळे (वय १९, म्हाळुंगे, ता. खेड, मूळगाव बोनगा, ता. अक्कलकोट, जि. सोलापूर) आणि सुमीत संतोष शिंगारे (वय १९, म्हाळुंगे, ता. खेड, मूळगाव निलंगा, जि. लातूर) यांना अटक केली. या तिघांना न्यायालयासमोर हजर केले असता दोन दिवसांची पोलिस कोठडी देण्यात आली. यावेळी त्यांनी तीन मोटारसायकल चोरल्याची कबुली दिली. पोलिस पथकाने आरोपींकडून एक लाख १५ हजार रुपये किमतीच्या तीन मोटारसायकली हस्तगत केल्या.
---