तळेगाव स्टेशन, ता. ९ : तळेगाव दाभाडे वाहतूक विभागाच्या दुर्लक्षामुळे तळेगाव-चाकण महामार्गावरील अवजड वाहतूक प्रवेशबंदी आणि शहरातील जटिल वाहतूक समस्यांबाबत कृती समितीने निवेदन दिले. बुधवारी झालेल्या बैठकीत नागरिकांनी वाहतूक विभागाच्या अधिकाऱ्यांवर तक्रारींचा भडिमार केला. अरुण माने, मिलिंद अच्युत, नितीन फाकटकर, मीरा फल्ले, नितीन जांभळे, सचिन देशपांडे, दिलीप डोळस, सुनील मोरे, शिवकुमार कोनाळीकर आदींनी मागण्यांचे निवेदन दिले. अवजड वाहतूक बंदीची वेळ दुपारी चार ते रात्री आठपर्यंत करावी, वडगाव फाटा ते माळवाडी दरम्यान रस्त्यावर वाहने उभी करण्यास बंदी घालावी, अवजड वाहन प्रवेश बंदीच्या सुधारित वेळांचे सूचना फलक दुतर्फा लावावेत, यासह अनेक मागण्या करण्यात आल्या. निवेदनाची दखल घेऊन वाहतूक समस्या निवारण करण्यासाठी प्रयत्न करणार असल्याचे सहायक पोलिस निरीक्षक गणेश लोंढे यांनी सांगितले.