तळेगाव स्टेशन, ता. १३ : इंद्रायणी विद्या मंदिर संचलित कांतिलाल शाह विद्यालयातील विद्यार्थ्यांनी एक हजार २०० चित्रकृतींच्या एकत्रीकरणातून साकारलेल्या दोन हजार चौरस फूट आकाराच्या भारताच्या नकाशाचे अनावरण करण्यात आले.
१२ भाषांतील देशभक्तिपर घोषवाक्यांच्या चित्रकृतीने बनविलेल्या नकाशाचे अनावरण ज्येष्ठ चित्रकार मिलिंद मुळीक, अमोल पवार आणि किशोरी जैन यांच्या हस्ते झाले. यावेळी संस्थेचे अध्यक्ष रामदास काकडे, संचालक संदीप काकडे, डॉ. शालिग्राम भंडारी, महेश शहा, विवेक इनामदार, सचिन शेलार आदी उपस्थित होते. शैलेश शहा यांचा संस्थेच्या उपाध्यक्षपदी निवड झाल्याबद्दल यावेळी सत्कार करण्यात आला. देशाला पुढे नेण्याची धडपड पाहिजे त्यातून अशा कलाकृती साकारतात, असे काकडे याप्रसंगी बोलताना म्हणाले. शिक्षक आणि विद्यार्थ्यांच्या मेहनतीतून साकारलेली ही कलाकृती विक्रमी ठरेल, असा आशावाद शैलेश यांनी यावेळी व्यक्त केला.
मुख्याध्यापिका अनन्या कुलकर्णी, वैशाली शिंदे, अर्चना चव्हाण, सारिका तितर, शिल्पा पाचलग, उषा टोणपी, अमृता देशमुख, अमृता परदेशी आणि सहकाऱ्यांनी नियोजन केले. नीता सिंग यांनी सूत्रसंचालन केले.