तळेगाव स्टेशन, ता. ११ : ‘पीएमआरडीए’च्या अखत्यारीत मावळ तालुक्यातील गावांमध्ये विकासकामांना गती द्यावी. ग्रामीण रस्त्यांसाठी आवश्यक निधी देण्‍याची मागणी आमदार सुनील शेळके यांनी गुरुवारी (ता.११) नागपूर येथील ‘पीएमआरडीए’च्या बैठकीत केली. यावर ‘‘सदर प्रस्तावाचा सकारात्मक विचार केला जाईल,’’ असे आश्वासन मुख्यमंत्री फडणवीस यांनी सभागृहात दिले.

मुख्यमंत्री देवेंद्र फडणवीस यांच्या अध्यक्षतेखाली नागपूर येथे ‘पीएमआरडीए’ अधिकाऱ्यांसोबत बैठक झाली. उपमुख्यमंत्री अजित पवार, उपमुख्यमंत्री एकनाथ शिंदे, संसदीय कार्यमंत्री चंद्रकांत पाटील, आमदार सुनील शेळके, ‘पीएमआरडीए’चे आयुक्त योगेश म्हसे, सदस्या दीपाली हुलावळे, एकवीरा देवस्थान ट्रस्टचे अध्यक्ष दीपक हुलावळे आदी उपस्थित होते. पीएमआरडीएसाठी एक उत्कृष्ट आणि व्यवहार्य रचना योजना तयार करण्याच्या सूचना मुख्यमंत्र्यांनी दिल्या.
‘पीएमआरडीए’मार्फत मंजूर विकासकामांची सद्यस्थिती आणि विस्तृत माहिती यावेळी सादर करण्यात आली. नगर नियोजन योजना जलदगतीने पूर्ण व्हावी आणि त्यासाठी वेळमर्यादा निश्‍चित करावी, अशी मागणीही केली. वडगाव नगरपंचायत हद्दीत ‘पीएमआरडीए’च्या माध्यमातून क्रीडासंकूल उभारण्याच्या आमदार शेळके यांच्या प्रस्तावावर मुख्यमंत्री फडणवीस आणि उपमुख्यमंत्री पवार यांनी तातडीने प्रस्ताव सादर करण्याची सूचना अधिकाऱ्यांना दिल्या.
--