वडगाव मावळ, ता. ३१ : सरकारने मालमत्ता करावरील शास्ती (दंडात्मक व्याज) माफीसाठी अभय योजना राबविण्याचा निर्णय घेतला असून, वडगाव नगरपंचायत हद्दीतील ज्या थकबाकीदार मिळकतधारकांची शास्तीची (दंडात्मक व्याज) थकबाकी आहे, अशा मिळकतधारकांनी १५ ऑगस्टपर्यंत अर्ज करून या योजनेचा लाभ घ्यावा, असे आवाहन मुख्याधिकारी डॉ. प्रवीण निकम यांनी केले आहे.
मुख्याधिकारी डॉ. निकम म्हणाले, ‘‘मालमत्ता करावरील शास्ती अंशतः/पूर्णतः माफ करण्यासाठी शास्ती वगळून मिळकतकराची पूर्ण रक्कम भरून विहित नमुन्यात अर्ज नगरपंचायत कार्यालयाकडे सादर करावा. अर्ज स्वीकारण्याची अंतिम मुदत १५ ऑगस्ट २०२५ असेल. अभय योजना एकदाच (केवळ २०२५-२६ या आर्थिक वर्षाकरिताच) लागू आहे. अभय योजना थकीत मालमत्ता कर वसुलीसाठी प्रोत्साहनपर आहे. जे मिळकतधारक अभय योजनेचा लाभ घेऊ इच्छितात, अशा मालमत्ताधारकांनी सवलत मागणीकरता परिपूर्ण प्रस्ताव नगरपंचायत कार्यालयाकडे सादर करावा. अर्जाचा विहित नमुना नगरपंचायत कार्यालयात तसेच www.npvadgaon.in या वेबसाइटवर उपलब्ध आहे. त्या नमुन्यातच अर्ज सादर करावा. प्रस्ताव सादर करताना सोबत आधारकार्ड छायाप्रत, २०२५-२६ च्या मालमत्ता कराच्या मागणी बिलाची छायाप्रत व शास्ती वगळून संपूर्ण कराची रक्कम भरलेल्या पावतीची छायाप्रत जोडणे आवश्यक आहे. शासनाच्या या योजनेचा जास्तीत जास्त नागरिकांनी लाभ घ्यावा, कराचा भरणा करण्यासाठी ऑनलाइन सुविधाही उपलब्ध आहे. शास्तीची (दंडात्मक व्याजाची) रक्कम वगळून उर्वरित कराची रक्कम ऑनलाइन पद्धतीने भरणा करावी. अधिक माहितीसाठी संपर्क - उमेश शिंदे ९१५८८२७४१४.