वडगाव मावळ, ता. १४ : वडगाव नगर पंचायतीतर्फे शुक्रवारी (१५ ऑगस्ट) संत ज्ञानेश्वर महाराज यांच्या पालखी मिरवणुकीचे आयोजन करण्यात आले आहे. संत ज्ञानेश्वर महाराज यांच्या सप्तशतकोत्तर सुवर्णमहोत्सवी (७५० वर्षे) जयंती वर्षानिमित्त याचे आयोजन करण्यात आल्याची माहिती मुख्याधिकारी डॉ. प्रवीण निकम यांनी दिली.
राज्य शासनाच्या निर्देशानंतर नगर पंचायतीने या सोहळ्याचे आयोजन केले आहे. ग्रामदैवत श्री पोटोबा महाराज मंदिरापासून शुक्रवारी सायंकाळी पाच वाजता ही पालखी मिरवणूक सुरू होईल. त्यानंतर खंडोबा मंदिर ते नगरपंचायत कार्यालय असा मिरवणुकीचा मार्ग असेल. शहरातील सर्व वारकरी सांप्रदाय, भाविक, सर्वपक्षीय पदाधिकारी व नागरिकांनी मोठ्या संख्येने या मिरवणुकीत सहभागी व्हावे, असे आवाहन मुख्याधिकारी डॉ. निकम यांनी केले आहे.