वडगाव मावळ, ता. २४ : श्री संत तुकाराम सहकारी साखर कारखान्याची आर्थिक वर्ष २०२४-२५ ची वार्षिक सर्वसाधारण सभा सोमवारी (ता.२९) सकाळी ११ वाजता होणार आहे. कारखान्याचे अध्यक्ष विदुरा नवले यांच्या अध्यक्षतेखाली वाकडच्या डांगे चौकातील द्रौपदा लॉन्स मंगल कार्यालयात याचे आयोजन करण्यात आले आहे, अशी माहिती कारखान्याचे उपाध्यक्ष अनिल लोखंडे यांनी दिली.
या सभेमध्ये आर्थिक वर्ष २०२४-२५ या वर्षातील ताळेबंदपत्रक, नफा-तोटा पत्रक, ऑडिट मेमो आदी तसेच अनेक विषय मंजुरीसाठी ठेवण्यात येणार आहेत. त्यात प्रामुख्याने सन २०२४-२०२५ या आर्थिक वर्षात ई-लिलावाद्वारे भंगार माल विक्रीस मान्यता देणे. सन २०२५-२०२६ साठी शासनमान्य लेखापरीक्षकांच्या नामतालिकेमधून वैधानिक लेखापरीक्षक यांची नेमणूक करणे व लेखापरीक्षण शुल्क ठरविणे. श्री क्षेत्र भंडारा डोंगरावरील संत तुकाराम महाराज मंदिराच्या बांधकामासाठी गाळपास आलेल्या ऊस बिलातून रक्कम कपात करून देणेबाबत निर्णय घेणे. जुना बॉयलर व सेंट्रीफ्युगल मशिन ई-लिलावात विक्री न झाल्यामुळे सदर बॉयलर व सेंट्रीफ्युगल मशिन भंगारात काढण्याबाबत निर्णय घेणे आदींचा समावेश आहे.
सर्व सभासदांनी सभेला उपस्थित राहावे, असे आवाहन उपाध्यक्ष लोखंडे यांनी केले आहे. दरम्यान, कारखान्याचा सन २०२५-२६ गळीत हंगाम शासनाच्या धोरणानुसार सुरू करण्यात येईल. हंगाम चालू करण्याच्या दृष्टीने सर्व कामे पूर्ण झालेली आहेत अशी माहिती कार्यकारी संचालक एस. जी. पठारे यांनी दिली.