वडगाव मावळ, ता. ३ : मोरया प्रतिष्ठानच्या वतीने २० ऑक्टोबरपर्यंत वडगाव व कातवीमधील नागरिकांना आयुष्मान भारत पंतप्रधान जन आरोग्य योजना, महात्मा जोतिराव फुले जन आरोग्य योजना आणि आयुष्मान भारत वयवंदना योजनांचा विनामूल्य लाभ मिळवून देण्यात येत आहे. आमदार सुनील शेळके यांच्या वाढदिवसानिमित्त या उपक्रमांचे आयोजन करण्यात आले आहे.
प्रतिष्ठानच्या जनसंपर्क कार्यालयात हे उपक्रम राबविण्यात येत आहेत. राष्ट्रवादी युवक काँग्रेसचे अध्यक्ष किशोर सातकर, वरिष्ठ उपाध्यक्ष पंढरीनाथ ढोरे, माजी नगराध्यक्ष मयूर ढोरे, मोरया महिला प्रतिष्ठानच्या अध्यक्षा अबोली ढोरे, माजी नगरसेविका पूनम जाधव आदींसह मोरया प्रतिष्ठान व राष्ट्रवादी काँग्रेसचे पदाधिकारी, कार्यकर्ते उपस्थित होते.
या योजनांसाठी आयुषमान भारत कार्डची प्रिंट काढून देण्यात येत आहे. लाभार्थींना शासनाने नेमून दिलेल्या खासगी तसेच शासकीय हॉस्पिटलमध्ये प्रतिवर्ष पाच लाख रुपयापर्यंत मोफत उपचार मिळणार आहेत. १ हजार ३५६ प्रकारच्या मोफत शस्त्रक्रियांसह विशेष उपचारांचा यामध्ये समावेश आहे. कुटुंबातील ७० वर्षांपुढील ज्येष्ठ नागरिक सदस्यांना आयुष्मान भारत, वय वंदना कार्डच्या माध्यमातून अतिरिक्त पाच लाख रुपयांपर्यंत मोफत उपचारही मिळणार आहेत.
मोरया प्रतिष्ठान जनसंपर्क कार्यालयात पंधरा दिवसांत सुमारे ८०० हून अधिक नागरिकांना आयुष्मान भारत या आरोग्यदायी योजनांची प्रत आमदार शेळके यांच्या हस्ते देण्यात आली, असे मोरया महिला प्रतिष्ठानच्या अध्यक्षा अबोली ढोरे यांनी सांगितले.