वडगाव मावळ, ता. ६ : मावळ तालुक्यातील साते येथे सामुदायिक पद्धतीने आयोजित करण्यात आलेला तुळशी विवाह उत्साहाच्या वातावरणात साजरा झाला. या सोहळ्यात गावातील लहान मुलांपासून ज्येष्ठ नागरिकांपर्यंत सर्वांनी सहभाग घेतला.
तुळशी विवाह हा विष्णूचा तुळशीशी विवाह लावण्याचा पूजोत्सव आहे. कार्तिक शुद्ध एकादशीपासून ते कार्तिक पौर्णिमेपर्यंत तुळशी विवाह करण्याची परंपरा आहे. कार्तिक शुक्ल एकादशी ते पौर्णिमा असे पाच दिवस ही दिवाळी असते. कार्तिक शुद्ध एकादशी म्हणजे प्रबोधिनी एकादशी होय. अशी श्रद्धा आहे की, या दिवशी श्रीविष्णू झोपेतून जागे होतात आणि चातुर्मास संपतो. विष्णूच्या या जागृतीचा जो उत्सव करतात त्याला प्रबोध उत्सव असे म्हणतात. हा उत्सव आणि तुळशी विवाह हे दोन्ही उत्सव एकत्रपणे करण्याची रूढी आहे. साते येथे हा तुळशी विवाह सोहळा सामुदायिक पद्धतीने भक्तिपूर्ण वातावरणात व उत्साहाने झाला. गावातील लहान थोरांनी या सोहळ्यात सहभाग घेतला. सोहळ्यासाठी उपस्थित सर्वांना भोजनाची व्यवस्था करण्यात आली होती.