वडगाव मावळ, ता. १२ : वैद्यमापन शास्त्र विभागाने नुकतीच श्री. संत तुकाराम साखर कारखान्याच्या वजन काट्याची तपासणी करून प्रमाणपत्र प्रदान केले.
श्री संत तुकाराम सहकारी साखर कारखान्याचा सन २०२५-२६ गळीत हंगाम सुरू झाला असून कारखान्याच्या कार्यक्षेत्रातील मुळशी, मावळ, खेड, हवेली व शिरूर या तालुक्यांतील ऊस गाळपासाठी येत आहे. १० डिसेंबरपर्यंत १ लाख १२ हजार ३५ मेट्रीक टन उसाचे गाळप होऊन १ लाख ३ हजार ८५० क्विंटल साखर उत्पादन झाले आहे. पुण्यातील वजन काटा भरारी पथकातील वैद्यमापन अधिकाऱ्यांनी १० डिसेंबर रोजी कारखान्यावर अचानक येवून वजन काट्याची तपासणी केली. उसाने भरलेल्या व रिकाम्या झालेल्या वाहनांची वजन काट्यावर सर्वांच्या समक्ष तपासणी करण्यात आली. वैद्यमापन शास्त्र उपनियंत्रक आर. ई. गवंडी, वैद्यमापन शास्त्र चिंचवड विभागाचे निरीक्षक आर. एस. परदेशी यांनी वजन काटा तंतोतंत असल्याचे प्रमाणपत्र कारखान्याला दिले. कारखान्याचे कार्यकारी संचालक एस. जी. पठारे, मुख्य अभियंता आर. बी. जगदाळे, प्रभारी सचिव एम. टी. काळोखे, इन्स्ट्रुमेंटेशन इंजिनिअर गणेश शिंदे, केनयार्ड सुपरवायझर देविदास उभेव आदींसह केनयार्ड विभागातील कर्मचारी उपस्थित होते.