कारवाई निषेधार्थ
काम बंद आंदोलन

वडगाव मावळ, ता. १५ : मावळातील तहसीलदार, मंडळ अधिकारी व ग्राममहसूल अधिकारी यांचे अन्यायकारक पद्धतीने झालेले निलंबन तत्काळ रद्द करून या अधिकारी व कर्मचाऱ्यांना सन्मानाने पूर्वपदावर पदस्थापना देण्यात यावी, मागणीसाठी महसूल विभागाच्या विविध संघटनांच्या वतीने सोमवारी सामूहिक रजा घेऊन काम बंद आंदोलन करण्यात आले. त्यामुळे येथील तहसील कार्यालयातील कामकाज ठप्प झाले होते. मंगरूळ येथील बेकायदा उत्खनन प्रकरणात कर्तव्यात कसूर केल्याप्रकरणी मावळच्या विद्यमान तहसीलदारांसह चार माजी तहसीलदार, चार मंडलाधिकारी व दोन तलाठी यांच्यावर निलंबनाची कारवाई करण्याची घोषणा महसूल मंत्री चंद्रशेखर बावनकुळे यांनी दोन दिवसांपूर्वी नागपूर येथील राज्य विधिमंडळाच्या अधिवेशनात केली होती. त्याचे तीव्र पडसाद महसूल विभागात उमटले असून, ही कारवाई अन्यायकारक पद्धतीने झाल्याचा आरोप महसूल संघटनांनी केला आहे. तहसीलदार व नायब तहसीलदार संघटना, महसूल कर्मचारी संघटना, ग्राम महसूल अधिकारी व मंडळ अधिकारी संघटना, वाहनचालक संघटना व महसूल सेवक संघटनेच्या वतीने याबाबत महसूल मंत्री चंद्रशेखर बावनकुळे यांना निवेदन देण्यात आले आहे.