वाकड, ता.२६ : शहरांतील रस्त्यांना सध्या खड्ड्यांचे ग्रहण लागले आहे. खड्ड्यांत रस्ता का रस्त्यात खड्डे असा प्रश्न जनतेला पडला आहे. काम होताच तत्काळ उखडणारे रस्ते व ते बनविणारे ठेकेदार तसेच संबंधित अधिकाऱ्यांना या प्रकरणी दोषी धरून त्यांची चौकशी करावी, अशी मागणी शिवसेना (शिंदे) युवा सेनेचे चिंचवड उपशहर प्रमुख सागर शिंदे यांनी
महापालिका आयुक्त तथा प्रशासक शेखर सिंह यांच्याकडे निवेदनाद्वारे केली आहे. शहरातील सर्वच रस्त्यांच्या कामाची पाहणी करून निकृष्ट दर्जाचे काम करणाऱ्या ठेकेदारांवर कारवाई करून त्यांना काळ्या यादीत टाकावे तसेच त्यांनी निविदा भरताना जी अनामत रक्कम भरली आहे; ती जप्त करण्यात यावी, असे निवेदनात म्हटले आहे.