शिवाजीनगर, ता. २२ : पॉसिबल ॲनिमल वेल्फेअर फाउंडेशनतर्फे शिवाजीनगर येथे पाळीव प्राणी परवाना जनजागृती आणि नोंदणी साहाय्य कार्यक्रम पार पडला. पुण्यातील पाळीव प्राणी पालकांसाठी या कार्यक्रमात परवाना घेण्याचे महत्त्व सांगण्यात आले आणि उपस्थित पालकांना प्रत्यक्ष परवाना नोंदणीची प्रक्रिया पूर्ण करण्यासाठी मदत करण्यात आली.

संस्थेचे सचिव ॲड. सुमेध गायकवाड यांनी पाळीव प्राणी परवान्याचे कायदेशीर फायदे स्पष्ट केले. त्यात त्यांनी ‘परवाना हा फक्त कायदेशीर कागदोपत्री प्रकार नसून, आपल्या प्राण्यांच्या आरोग्याचे व समाजाच्या सुरक्षिततेचे आश्वासन आहे.

या कार्यक्रमाद्वारे पुण्यातील पाळीव प्राणी पालकांना योग्य माहिती देऊन जबाबदार प्राणी पालनाची संस्कृती निर्माण करण्याचा प्रयत्न करत आहोत.’ कार्यक्रमाला अध्यक्ष श्रद्धा सानप, कस्तुरी मोरे, विशाल घोडके, दिव्या गाडे, प्रथमेश झुंजूरके, स्वरदा नाफडे, राधा राजे उपस्थित होते. प्रत्यक्ष पाळीव प्राणी पालकांची नोंदणी प्रक्रिया पूर्ण होईपर्यंत ॲड.अमित निकम यांनी त्यांना मार्गदर्शन केले.