सकाळ इम्पॅक्ट

हिंजवडी, ता.३० : बांधकाम प्रकल्पांवरील अवजड वाहनांच्या बेफाम वर्दळीमुळे नागरिकांच्या सुरक्षेसह रस्त्यांची स्वच्छता धोक्यात आली आहे. या विरोधात पोलिसांपाठोपाठ महापालिकेनेही कठोर पावले उचलली आहे. रस्ता घाण करून पर्यावरण आणि सार्वजनिक आरोग्य नियमांचे उल्लंघन केल्याबद्दल पुनावळे, ताथवडे परिसरातील बांधकाम व्यावसायिकांवर दंडात्मक कारवाई करण्यात आली.
पुनावळे, ताथवडे परिसरातील बांधकाम प्रकल्पांवरील अवजड वाहनांनी राडारोडा वाहताना कुठलीही काळजी घेतली नाही. वाहनांतून चिखल, राडाराडा गळून परिसरातील रस्ते चिखलाने निसरडे, धोकादायक व घाण केले. याबाबत ‘सकाळ’ने सविस्तर वृत्त दिले होते. बांधकाम साहित्य खाली पडू नये म्हणून वाहनांवर कुठलेही आच्छादन टाकले नाही, आदी कारणांसाठी महापालिकेच्या पर्यावरण विभागाने संबंधित व्यावसायिकांवर सुमारे एकूण सव्वा लाख रुपयांची दंडात्मक कारवाई केली.
वाकड, हिंजवडी, ताथवडे, पुनावळे पंचक्रोशीत वाहनचालकांच्या निष्काळजीपणामुळे अपघात होऊन तसेच वाहनांतून बांधकामाचा राडारोडा रस्त्यावर पडून वाहने घसरून काहीजणांना जीव गमवावा लागला; तर अनेक जण गंभीर जखमी झाले. त्या विरोधात हिंजवडी पोलिसांनी कठोर पावले उचलत वाहनचालकांसह प्रकल्प व्यवस्थापक व वाहन मालकांवरही देखील गुन्हे दाखल केले होते. त्याला अनुसरून महापालिकेची ही कारवाई अशा अपघातांना ब्रेक लावण्यासाठी महत्त्वाची मानली जात आहे.

राडारोडा रस्त्यावर सांडल्याने अनेक वाहने घसरून गंभीर अपघात झाले आहेत. काहींचे जीवही गेले. त्यामुळे या भागांत कठोर कारवाई केली जात आहे. बांधकाम व्यावसायिकांनी देखील खबरदारी घेऊन अशा प्रकारांना आळा घालून दंडात्मक कारवाई टाळावी. नागरिकांनी अशा प्रकारची तक्रार केल्यास तिची तत्काळ दखल घेतली जाईल.
- राहुल वणवारी, प्रमुख, पर्यावरण पथक