वाकड, ता. ४ : श्री दत्त मंदिरात नवनाथ तरुण मंडळ व समस्त वाकड ग्रामस्थ आयोजित श्री दत्त जयंती सोहळा उत्साहात साजरा करण्यात आला. वाकड आणि परिसरातील आयटी अभियंते आणि नागरिकांनी मिळून ३० हजाराहून अधिक भाविकांनी दर्शनाचा लाभ घेतला. शुक्रवारी (ता. ५) सकाळी दहा वाजता गुरुवर्य सखाराम महाराज गोपाळे यांच्या काल्याचे कीर्तनाने सांगता होणार आहे.
दत्त जयंतीनिमित्त सायंकाळी १५ हजाराहून अधिक भाविकांच्या महाप्रसादाची व्यवस्था करण्यात आली आहे. कॉम्प्युटर विश्वात गुंग असलेल्या हजारो आयटीयन्स अभियंत्यांनी रांगेत उभे राहून दर्शन घेतले. गाभाऱ्यात श्री दत्तात्रेयांची सगुण मूर्ती, मूर्ती भोवताली फुलांनी साकारलेली दोन मयुराची आरास आकर्षक होती. मंदिर परिसर फुलांच्या तोरणांनी नटले होते. पहाटे कार्तिक स्नान, काकडा आरती झाली. सकाळी गुरू चरित्र पारायण, दुपारी सामूहिक होम हवन असे भरगच्च धार्मिक कार्यक्रम पार पडले.
दुपारी महंत राम महाराज वणवे शास्त्री यांचे श्री दत्त जन्माचे कीर्तन झाले. अखंड हरिनाम सप्ताहात आठ दिवसांमध्ये भक्तिमय वातावरणात विविध धार्मिक कार्यक्रमांसह दररोज सायंकाळी सहा ते आठ या वेळेत कीर्तनकारांचे दत्त चरित्र-कीर्तन झाले आहे. नवनाथ तरुण मंडळाचे सर्व सदस्य, पदाधिकारी व समस्त वाकड ग्रामस्थ यांनी नियोजन केले आहे.