पिंपरी - ते दोघे भाऊ. आदित्य (Aaditya) आणि अपूर्व. (Apurv) आदित्यचा विवाह दीड वर्षांपूर्वी झालेला. अपूर्वचा येत्या दिवाळीत ठरलेला. दोघांसह आई-वडील व आदित्यच्या पत्नीला संसर्ग (Infection) झालेला. पाचही जण वेगवेगळ्या रुग्णालयांत (Hospital) दाखल. या महामारीतून सुखरुप बाहेर पडू, असा सर्वांना विश्र्वास. एकमेकांना धीर दिला. पण, शुक्रवारी दुपारी अपूर्वने आणि शनिवारी पहाटे आदित्यने निरोप घेतला. वडिलांवर वायसीएम रुग्णालयात आयसीयूमध्ये उपचार सुरू आहेत. कोरोनातून (Corona) बऱ्या होऊन घरी आलेल्या सासू-सुनांच्या अश्रुंचा बांध मात्र फुटला आहे. आकुर्डी येथील जाधव कुटुंबीयांची ही शोकांतिका. (Two Brothers Fight against Corona Fails)

दत्तवाडी आकुर्डी येथील विजय जाधव (मूळगाव कढोली, जि. सातारा) यांचे मध्यमवर्गीय सुखी कुटुंब. प्रतिकूल परिस्थितीवर मात करून त्यांनी संसाराचा गाडा हाकलला. कालांतराने दोन्ही मुले बरोबरीचे झालेत. आदित्य (वय २७) नमो बिल्डर्स यांच्याकडे नोकरीस होता. तर, अपूर्व (वय 25) यांचे पुणे महापालिका सेवेत कंत्राटी कामगार होता. भवानी पेठेतील सोनवणे रुग्णालयात तो कार्यरत होता. कोरोनाची लक्षणे दिसू लागल्याने तपासणी केली. संसर्ग झाला होता. त्यामुळे घरातील सर्वांचीच तपासणी केली. आई-वडील, भाऊ, वहिनी सर्वांनाच संसर्ग झालेला. सर्व जण वेगवेगळ्या रुग्णालयांत दाखल झाले. एकमेकांशी फक्त फोनवर बोलणे. आठ दिवसांच्या उपचारानंतर आई व वहिनीला डिस्चार्ज मिळाला. आता दोन्ही मुले व पतीही बरे होऊन घरी येतील. या आशेवर आई होती.

गुरुवारी अपूर्वची आॅक्सिजन पातळी पंच्यान्नवपेक्षा अधिक होती. पण, शुक्रवारी दुपारी त्याची प्रकृती खालावल्याचा निरोप आला आणि त्याची मित्रमंडळी रुग्णालयात पोचत नाही तोच त्याचे निधन झाल्याचे डॉक्टरांनी सांगितले. सर्वांनाच धक्का बसला. त्याच्यावर अंत्यसंस्कार करून काही तास उलटत नाही, तोच शनिवारी पहाटे आदित्यने जगाचा निरोप घेतला. दोन्ही भावांचे अकाली जाणे सर्वांसाठीच धक्कादायक ठरले. त्यांच्या पश्चात आई, वडील, वहिनी व बहिण असा परिवार आहे. सकाळचे कर्मचारी हेमंत कोंडे त्यांचे मामा होत. दोन्ही मुलांचे निधन झाले, हे अद्याप वडिलांना माहिती नाही.

मित्रांच्या प्रयत्नांना अपयश

नमो बिल्डरचे संचालक योगेश जैन व देवेश जैन यांनी आदित्यच्या उपचारासाठी खूप प्रयत्न केले. त्यांचे सहकारी अमर दुर्गावले व अरविंद वाघ हे दररोज पीपीई कीट घालून रुग्णालयात जायचे. आदित्यचे मनोधैर्य उंचवायचे. समुपदेशन करायचे. योगेश जैन यांनी उपचारासाठी सुमारे तीन लाख रुपये खर्च केले. त्याच्या कुटुंबीयांना वेळोवेळी धीर दिला. पण, आदित्य आम्हाला सोडून गेला, अशी भावना त्याच्या मित्रांनी व्यक्त केली.