पिंपरी : अभिनेत्री सोनाली कुलकर्णी राहत असलेल्या निगडी येथील इमारतीत शिरलेल्या तरुणाने सोनालीच्या वडिलांवर चाकू हल्ला केला. दरम्यान, आरोपी सोनालीचा 'फॅन' असून सोनालीने दुबईत विवाह केल्याचे समजल्यापासून तो बेचैन होता. तिला भेटण्यासाठी घरी आल्यानंतर झालेल्या झटापटीत हा प्रकार घडल्याची चर्चा आहे. मात्र, या आरोपीकडे नकली बंदूक, घरगुती चाकू, स्प्रे, दोरी सापडली असून तो चोरीच्या उद्देशाने आल्याचे पोलिसांनी स्पष्ट केले असून त्याच्यावर तसा गुन्हाही दाखल केला आहे.

अजय विष्णू शेक्टे (वय २४, रा. पाचरगी, ता. पाटोदा, जि. बीड) असे पोलिसांनी ताब्यात घेतलेल्या चोरट्याचे नाव आहे. याप्रकरणी अभिनेत्री सोनाली यांचे वडील मनोहर गणपतराव कुलकर्णी (वय ६३, रा. वरलक्ष्मी अपार्टमेंट, सेक्टर क्रमांक २५, प्राधिकरण, निगडी) यांनी निगडी पोलिस ठाण्यात फिर्याद दिली आहे. सोनाली यांचे कुटुंबीय प्राधिकरणात वरलक्ष्मी अपार्टमेंट या इमारतीत तिसऱ्या मजल्यावर राहतात. मंगळवारी सकाळी सोनालीचे आई - वडील घरात असताना आरोपी अजय सकाळी सातच्या सुमारास या इमारतीत दुसऱ्या मजल्यावर आला. येथे त्याची एका रहिवाशासोबत झटापटी झाली. त्याने आरडाओरडा केल्याने सोनाली यांचे वडील खाली धावत आले. यावेळी अजयने मनोहर यांच्या चेहऱ्यावर स्प्रे मारला. तरीही मनोहर यांनी अजयला अटकाव करण्याचा प्रयत्न केला. मात्र, अजयने त्यांच्यावर चाकूने वार केला. यामध्ये ते किरकोळ जखमी झाले. त्यानंतर अजय तिसऱ्या मजल्यावर आला. मनोहर यांच्या पत्नीला गळ्यातील सोन्याचे दागिने काढून द्या, अन्यथा तुम्हाला जीवे मारेल, अशी धमकी दिली. आरडाओरडा झाल्याने परिसरातील नागरिकांनी कुलकर्णी यांच्या घराकडे धाव घेतली.

यावेळी अजयने पळून जाण्याच्या प्रयत्नात दुसऱ्या मजल्यावरून खाली उडी मारली. मात्र, तो हॉटेलच्या पत्र्यावर पडल्याने त्याच्या पायाला जखम झाली. अजयला पकडून नागरिकांनी त्याला चोप दिला. याबाबत पोलिसांना कळविल्यानंतर घटनास्थळी दाखल झालेल्या पोलिसांनी अजयला ताब्यात घेतले. त्याच्याकडून नायलॉन दोरी, चाकू, स्प्रे जप्त केले. दरम्यान, नागरिकांनी केलेल्या मारहाणीत अजय जखमी झाला असून त्याला उपचारासाठी रूग्णालयात दाखल केले.

दरम्यान, आरोपी अजय हा सोनाली यांचा चाहता असून सोनालीला भेटायला जायचं असं त्याने ठरवलं होतं. अशात नुकतंच सोनालीने दुबईत विवाह केल्याचं सोशल मीडियावर जाहीर केल्यानंतर तो बेचैन होता. एकदा बोलावं तरी, भेटावं तरी असं वाटायचं. 'दरम्यान, अजय मंगळवारी त्यांच्या घरापर्यंत पोहचला. त्यातूनच त्याने हा प्रकार केल्याची चर्चा आहे.