Kalki 2898 Ad Trailer : 'बाहुबली' फेम प्रभास, अमिताभ बच्चन, कमल हसन आणि दीपिका पदुकोण यांची मुख्य भूमिका असलेल्या 'कल्की 2898 AD' सिनेमाची चर्चा सध्या सगळीकडे आहे. काही ना काही कारणामुळे सिनेमाचं प्रदर्शन बराच काळ रखडलं होतं पण अखेर हा सिनेमा लवकरच रिलीज होणार असून नुकतीच सोशल मीडियावर सिनेमाची रिलीज डेट जाहीर करण्यात आली.

प्रभासने त्याच्या सोशल मीडिया हँडलवर सिनेमाचं नवीन पोस्टर शेअर केलं. या पोस्टरमध्ये एका मातीच्या ढिगाऱ्यावर उभा राहिलेला प्रभास दिसत असून त्याच्यामागे इमारती आणि एक अदृश्य ढाल दिसतेय. तर त्याने शरीरावर भैरव कवच चढवलेलं दिसत आहे. या पोस्टरला 'आता भविष्य उलगडणार ! १० जूनला ट्रेलर येतोय' असं कॅप्शन देण्यात आलं आहे. प्रभास या सिनेमात भैरवा ही भूमिका साकारणार आहे.

अनेकांनी कमेंट करत प्रभासच्या लूकचं कौतुक केलं आणि त्याचा हा सिनेमा पाहण्यासाठी उत्सुक असल्याचं सांगितलं.

तर अमिताभ बच्चन यांनीही त्यांच्या सिनेमातील लूकमधील पोस्टर शेअर करत सिनेमाचा ट्रेलर १० जूनला रिलीज होत असल्याची घोषणा केली. या पोस्टरमध्ये अमिताभ यांच्या एका हातात काठी दिसत असून एका हातात तलवार दिसत आहे. तर लांब केस आणि अंगाभोवती गुंडाळलेलं वस्त्र, कपाळावरील मण्यातून निघणारं तेज लक्ष वेधून घेतंय. अमिताभ या सिनेमात अश्वत्थामा ही भूमिका साकारणार असून त्यांच्या भूमिकेचा टीझरही गाजला होता.

या व्यतिरिक्त या सिनेमात दीपिका पदुकोण आणि कमल हसन यांच्या मुख्य भूमिका आहेत. दीपिका पद्मा ही भूमिका साकारणार आहे. तर कमल हसन काली या निगेटिव्ह भूमिका साकारणार असल्याचं म्हंटलं जातंय.

महाभारत ते कलियुगाचा अंत यावर हा सिनेमा बेतलं असून पुराणांमध्ये लिहिलेल्या कल्की अवतारावर हा सिनेमा बेतलं असल्याचं म्हंटलं जातंय. ही एक सायन्स फिक्शन फिल्म आहे. २७ जून २०२४ ला हा सिनेमा सगळीकडे रिलीज होणार असून हा सिनेमा हिंदी, तेलुगू, तामिळ, मल्याळम आणि कन्नड भाषांमध्ये रिलीज होणार आहे.