Aishwarya Narkar Post : अभिनेत्री ऐश्वर्या नारकर त्यांच्या अभिनयाबरोबरच त्यांच्या सोशल मीडिया पोस्टमुळेही चर्चेत असतात. त्यांचे योग सेशन्स, डान्स रील्स, फोटोशूट्स कायमच सोशल मीडियावर गाजतात पण नुकतीच त्यांनी केलेल्या सोशल मीडिया पोस्टमुळे सगळ्यांचं लक्ष वेधून घेतलं. ऐश्वर्या यांच्या कारच्या बोनेटमध्ये त्यांना सापडलेल्या वस्तूमुळे त्यांनी नागरिकांना सतर्क राहण्याचा इशारा दिला आहे.

ऐश्वर्या यांची पोस्ट

सोशल मीडियावर ऐश्वर्या यांनी एक व्हिडीओ शेअर केला. या व्हिडिओमध्ये त्या म्हणाल्या,"हाय, काल जरा एक गोंधळ झाला म्हणून आवर्जून हा व्हिडीओ करतेय. काल माझी गाडी सर्व्हिसिंगसाठी गेली होती. एक-दोन तासांनी तिकडून मला फोन आला कि, तुमच्या आजूबाजूला काही मांजरं आहेत का ? तर म्हंटलं, हो खूप आहेत. का ? काय झालं ? तर ते म्हणाले, तुमच्या गाडीत तीन मांजराची छोटी बाळं सापडली आहेत. माझ्या पोटात अक्षरशः गोळा आला कारण, आदल्याच रात्री एका मांजरीने आमच्या बिल्डिंगमध्ये तीन पिल्लांना जन्म दिला होता. त्यांना आम्ही बॉक्समध्ये ठेवलं होतं कारण पावसापाण्याचे दिवस आहेत ती सेफ राहावी म्हणून. पण कधी ती माझ्या गाडीत बाळांना घेऊन गेली, तिने कधी बाळांना माझ्या गाडीत ठेवलं हे कळलं सुद्धा नाही. गाडी चौदा-पंधरा किलोमीटर चालली तरीही बाळं अगदी सुरक्षित होती ही अक्षरशः देवाची कृपा आहे. त्या सर्व्हिस स्टेशनच्या माणसांनी त्या बाळांना आणून सोडलं, त्यांच्या आईला भेटवलं आणि आता ते सगळे सेफ आहेत. पण मला तुम्हाला हेच सांगायचं आहे कि, पावसापाण्याचे दिवस आहेत तर गाडी काढण्यापूर्वी गाडीचं बॉनेट उघडून त्यात टॉर्च मारून पिल्लं आहेत का बघा. गाडीच्या खाल्ली सुद्धा बघा कारण आपल्याला कळतही नाही आणि या बाळाचा उगाच जीव जाऊ शकतो. सो प्लिज एवढी काळजी घ्या थँक यु. "

सोशल मीडियावर ऐश्वर्या यांचा हा व्हिडीओ व्हायरल झाला असून अनेकांनी कमेंट करत सर्व्हिस स्टेशनमधील माणसांच्या तत्परतेच कौतुक केलं आहे. तर ऐश्वर्या यांनी व्यक्त केलेल्या काळजीबद्दलही त्यांनी त्यांची मतं व्यक्त केली. ऐश्वर्या यांच्या मताशी अनेकांनी सहमती दर्शवली आणि त्यांच्याबरोबर घडलेले प्रसंग शेअर केले.

ऐश्वर्या सध्या 'सातव्या मुलीची सातवी मुलगी' या मालिकेत काम करत असून त्यांची ही मालिका खूप गाजतेय.