बॉलिवूडमधील आघाडीची अभिनेत्री अनुष्का शर्माने तिच्या उत्तम अभिनयाने कमी कालावधीतच स्वतःचा चाहतावर्ग कमावला आहे. तिने तिच्या करिअरमध्ये आजवर वेगवेगळ्या भूमिका साकारल्या आहेत. आज म्हणजे १ मेला अनुष्काचा वाढदिवस आहे. या ३६ वर्षीय अभिनेत्रीने आजवर अशी यशाची शिखरं गाठली आहेत जिथे अजून इतर अभिनेत्री पोहोचू शकल्या नाहीयेत. बबली आणि बेधडक स्वभावामुळे प्रसिद्ध असलेली अनुष्का खऱ्या आयुष्यात लोकांशी लगेच नाती जोडत नाही. काय आहे यामागचं कारण जाणून घेऊया.

अनुष्काने काही वर्षांपूर्वी झी मीडियाला मुलाखत दिली होती. यावेळी तिने खुलासा केला कि, ती लोकांशी लगेच मैत्री करत नाही. यामागचं कारण सांगताना ती म्हणाली,"मी लोकांशी भावनिक संबंध जोडत नाही किंवा लगेच मैत्री करत नाही. याचा अर्थ असा नाही कि मी लहानपणापासूनच अशीच होते. पण या इंडस्ट्रीत आल्यावर मी हे शिकले आहे. कारण, मी लोकांना बदलताना पाहिलंय. मला किती यश मिळतंय याच्या मोजमापावर त्यांनी माझ्याशी नातं ठेवलं आहे आणि हे सगळेचजण करतात."

इतकंच नाही तर अनुष्का तिच्या वैयक्तिक आयुष्यावर फार कमी वेळा बोलताना दिसते. ती त्यावर कधीच चर्चा करत नाही. इतकंच नाही तर ती फक्त तिच्या मित्रांशी सुद्धा फोनवर, मेसेजवर कामापुरतंच बोलते, ती तिचं काम पूर्ण करून निघून जाते असं तिची मैत्रीण आणि अभिनेत्री कतरीना कैफने एका मुलाखतीत सांगितलं होतं.

अनुष्का आणि साक्षी आहेत शाळेतील मैत्रिणी

अनुष्का आणि साक्षी शाळेतील मैत्रिणी आहेत. साक्षी आणि अनुष्का आसाममध्ये एकाच शाळेत शिकत होत्या. काही काळाने अनुष्काच्या वडिलांची बदली दुसऱ्या शहरात झाली. जेव्हा क्रिकेट सामन्यादरम्यान अनुष्का आणि साक्षीची भेट झाली तेव्हा त्यांना गप्पांमध्ये त्या दोघी एकाच वर्गात होत्या हे कळलं. काही काळाने अनुष्काला त्यांचा एक फोटोही मिळाला ज्यात साक्षीने परीचे कपडे घातले असून अनुष्काने घागरा-चोळी घातली आहे. त्यांचा हा फोटो सोशल मीडियावर चर्चेत होता.

अनुष्काने नुकताच तिचा मुलगा अकायला जन्म दिला. ती आता तिच्या दोन्ही मुलांसोबत मुंबईत परतली असून ती जास्तीत जास्त वेळ तिच्या मुलांसोबत स्पेंड करते आहे.