Friendship Day Special: आज ऑगस्ट महिन्याच्या पहिल्या रविवारी फ्रेंडशिप डे साजरा केला जातोय. बॉलिवूडमध्येही असे अनेक कलाकार सांगता येतील जे एकमेकांचे अगदी जिवलग मित्र आहेत. अनेक वर्ष हे कलाकार आपली मैत्री जपत आहेत. अशीच एक जिवलग मित्रांची जोडी म्हणजे जॅकी श्रॉफ आणि डॅनी डॅनी डेन्झोंग्पा. या वयातसुद्धा ते दोघे आपली मैत्री जपत आहेत. कधी जॅकी डॅनीला भेटायला सिक्कीमला जातो तर कधी डॅनी त्याला भेटायला मुंबईला येतात. ते दोघे मिळून खूप फिरतात. ट्रिप काढतात. त्यांची पहिली भेट जॅकीच्या पहिल्या चित्रपटाच्या सेटवर म्हणजेच 'हिरो'च्या सेटवर झाली होती. आता मैत्रीदिनानिमित्त दिलेल्या मुलाखतीत डॅनी यांनी त्यांचा एक जुना किस्सा सांगितला आहे.

हा किस्सा तेव्हाचा आहे जेव्हा डॅनी जॅकीला भेटायला चाळीत गेले होते. टाइम्स ऑफ इंडियाला दिलेल्या मुलाखतीत डॅनी म्हणाले, 'मी त्याला हिरोच्या सेटवर पहिल्यांदा पाहिलं. तो चित्रपट हिट झाला आणि मी त्याला भेटायला त्याच्या मुंबईतल्या तीन बत्ती चाळीत गेलो. मी तेव्हा लोकप्रिय झालो होतो त्यामुळे मी जॅकीला भेटायला गेलो पण मलाच बघायला खूप गर्दी झाली. माझ्याबाजूला खूप लोक जमा झाले. तेव्हा जॅकी त्याच्या घरातून शर्ट शिवाय फक्त टॉवेलवर बाहेर आला. त्या माणसांना तो बाजूला करत होता. तो एकदम दादा, भाई सारखा वागत होता. मला येऊ बघून खूप आश्चर्य वाटलं की तो तिथे एका वन रूम किचनमध्ये राहत होता.'

डॅनी पुढे म्हणाले, 'त्याचा चित्रपट खूप हिट झालेला. तरीही तो तिथेच राहत होता. तो तिथून जाऊ शकत होता. मी त्याच्या आईला भेटलो. त्याच्या गर्लफ्रेंडलाही भेटलो जी आता त्याची पत्नी आहे आयेशा. ती आता माझी बहीण आहे. ती मला राखी बांधते. आमच्यात फिरणं आणि कुकिंग या दोन गोष्टी समान आहेत. आमचं निसर्गावर प्रेम आहे. आधी एक फुल लावायचं माहीत नसणारा जॅकी आता मला बगीचा कसा फुलवायचा यावर भाषण देतो.' डॅनी सध्या ७६ वर्षांचे आहेत तर जॅकी यांचं वाया ६७ आहे.