बॉलिवूड अभिनेत्री कंगना रणौतला नुकतेच भारतीय जनता पक्षाने लोकसभा निवडणुकीसाठी हिमाचल प्रदेशातील मंडीमधून उमेदवारी जाहीर केली आहे. त्यामुळे कंगना सध्या आपल्या मूळ गावी आहे.

दरम्यान देशभरातील अनेक भागांत आज होळी (रंगपंचमी) साजरी केली जात आहे. हाच मुहूर्त साधत कंगणाने होळी खेळत आपल्या प्रचाराचा बार उडवून दिला आहे. अभिनेत्रीने याबाबतची पोस्ट शेअर करून माहिती दिली. (Kangana Ranaut Starts Election Campaign On Occasion of Holi)

कंगना रणौतने तिच्या होळी सेलिब्रेशनचे फोटो इन्स्टाग्रामवर शेअर केले आहेत. एका फोटोमध्ये, कंगणाने चाहत्यांना होळीच्या शुभेच्छा दिल्या आहेत, ज्यामध्ये ती तिच्या चेहऱ्यावर रंग आणि हिमाचली टोपी घातलेली दिसत आहे.

तर दुसऱ्या छायाचित्रात कंगना काही महिलांसोबत गुलाल उधळून त्यांच्यासोबत होळी साजरी करताना दिसत आहे. ही पोस्ट शेअर करताना कंगना राणौतने कॅप्शनमध्ये लिहिले की, 'मेरे गाँव की मिट्टीने मुझे बुलाया हैं, मेरे देश ने मुझे अपनाया हैं.'

यंदाच्या लोकसभा निवडणुकीसाठी सत्ताधारी भारतीय जनता पक्षाने कंगनाला हिमाचल प्रदेशच्या मंडी लोकसभा मतदारसंघातून उमेदवारी दिली आहे.

दरम्यान कंगनानेही रविवारी तिच्या इन्स्टा स्टोरीमध्ये एक पोस्ट शेअर करत लोकसभा निवडणूक लढवणार असल्याची माहिती दिली होती.

आपल्या स्टोरीमध्ये कंगना म्हणाली होती की, "माझ्या प्रिय भारताने आणि भारतातील जनतेने माझ्या पक्षाला, भारतीय जनता पक्षाला नेहमीच पाठिंबा दिला आहे. आज भाजपच्या राष्ट्रीय नेतृत्वाने मला माझ्या जन्मभूमी, हिमाचल प्रदेश, मंडी येथून लोकसभेचे उमेदवार म्हणून घोषित केले आहे.

दरम्यान गेल्या काही वर्षांमध्ये सतत वादाच राहणाऱ्या कंगनाने काही दिवसांपूर्वीच राजकारणात येण्याची इच्छा व्यक्त केली होती.

त्यावेळी कंगना म्हणाली होती की, "मी चित्रपटांच्या सेटवरुन अनेक राजकाण्यांशी लढली आहे. त्यामुळे आता मी राजकारणात प्रवेश करण्याची वेळ आली आहे."