Suyash Tilak Share Post on Instagram: लोकसभा निवडणुकीच्या (lok sabha elections 2024) चौथ्या टप्प्याचं मतदान करण्यासाठी लोक मतदान केंद्रांवर गर्दी करत आहेत. अनेकांनी मतदान केंद्रावर जाऊन आपला हक्क बजावला आहे. पण काहींना मात्र मतदान करताना आले नाही. अभिनेता सुयश टिळक (Suyash Tilak) हा देखील त्यांच्यापैकीच एक आहे. सुयशनं नुकतीच सोशल मीडियावर एक पोस्ट शेअर करुन मतदानाचा हक्क बजावता न आल्याबद्दल खंत व्यक्त केली आहे.

सुयश टिळकची पोस्ट

सुयश टिळकनं इन्स्टाग्रामवर शेअर केलेल्या पोस्टमध्ये लिहिलं, "गेल्यावेळी मतदान केले तेव्हा नावात चूक असलेली सुधारायचा अर्ज दिला होता ह्यावेळी सुदैवाने ओनलाईन पोर्टलवर खूप शोधून शेवटी नाव सापडले असताना (त्यात तीच चूक होतीच) वोटींग बूथला सकाळी 7 वाजता पोहोचलो. माझ्या ऑनलाईन पोर्टल वरच्या यादीच्या नोंदीत असलेल्या जागी बूथवर असलेल्या यादीत मात्र वेगळेच नाव आढळले, म्हणून 3 तास वेगवेगळ्या बूथ वर जाऊन नाव शोधायचा प्रयत्न केला अचानक ह्यावेळी काही जणांचा मतदार संघच बदलला आहे ते कळले म्हणून वेगळ्या मतदार संघात पण चौकशी केली शोधाशोध केली." सुयशच्या या पोस्टनं अनेकांचे लक्ष वेधले आहे.

"गेली अनेक वर्ष मी मतदान न चुकता करत आलो आहे, ह्यावेळी मला तो हक्क बजावता आला नाही. कोणत्याही इतर पर्यायाने देखील मतदान करू दिले नाही ह्याची खंत वाटते वाटत राहील.", असंही सुयशनं पोस्टमध्ये लिहिलं.

सुयशनं या पोस्टला कॅप्शन दिलं, "दुर्दैवाने मला मतदानाचा हक्क बजावण्यापासून रोखण्यात आलं, कारण यावर्षी माझे नाव यादीतून गायब झाले आहे."

'या' सेलिब्रिटींनी बजावला मतदानाचा हक्क

सोनाली कुलकर्णी, सुबोध भावे, अमोल पालेकर, मोहन आगाशे, मृणाल कुलकर्णी या सेलिब्रिटींनी मतदानाचा हक्क बजावला आहे.