छोट्या पडद्यावरील प्रसिद्ध अभिनेत्री नौशिन अली सरदार हिने आजवर अनेक मालिकांमध्ये अभिनय करून लोकप्रियता मिळवली. ‘कुसुम, बरसाते मौसम प्यार का, दो दिलों के खेल में, अल्लादिन’ अशा अनेक मालिकांतून ती घराघरात पोहोचली.

दरम्यान, नुकत्याच झी टीव्‍हीवर सुरू झालेल्या ‘वसुधा’ या मालिकेतून तिने बऱ्याच कालावधीनंतर छोट्या पडद्यावर पुनरागमन केले आहे. या मालिकेत ती चंद्रिकाची प्रमुख भूमिका साकारत आहे. तसेच, अभिनेत्रीने तिचा लूक आकर्षक दिसावा, यासाठी तिच्या वैयक्तिक कलेक्‍शनमधील आभूषणांचा वापर करत असल्याचे तिने सांगितले आहे

. याबद्दल ती म्हणाली, ‘‘मी माझ्या भूमिकांमध्‍ये नेहमी वास्‍तविकता व भावनिकतेची भर देते, भूमिकेचा लूक आकर्षक दिसण्‍यासाठी मी माझ्या टीमसोबत बारकाईने काम करते. साडीचा रंग असो, मेकअप असो किंवा आभूषणे असो मला त्‍या प्रक्रियेमध्‍ये सामावून जाण्‍यास आवडते. सुरूवातीला मी त्‍यांना माझे वैयक्तिक कलेक्‍शन दाखवले आणि मी त्‍यामधून काही आभूषणे परिधान करत असल्‍याचे समजल्‍यानंतर त्‍यांना खूप आनंद झाला.

भूमिकेसाठी माझ्या स्‍वत:च्‍या आभूषणांचा वापर करत असल्‍यामुळे मला भूमिकेमध्‍ये सामावून जाण्‍यास मदत होते.’’ दरम्यान, ‘वसुधा’ या मालिकेत नौशीनसह प्रिया ठाकूर आणि अभिषेक शर्मा यांच्यादेखील प्रमुख भूमिका आहेत. तसेच, ‘वसुधा’ ही मालिका दर सोमवार ते शुक्रवार रात्री साडेदहा वाजता झी टीव्‍हीवर प्रेक्षकांना पाहायला मिळणार आहे.