लोकप्रिय मराठी अभिनेता स्वप्नील जोशी आणि अभिनेता प्रसाद ओक हे दोघेही सध्या सोशल मीडियावर प्रचंड चर्चेत आहेत. नुकत्याच त्या दोघांनी एकमेकांना त्यांच्या चित्रपटांसाठी शुभेच्छा दिल्या होत्या आणि हे दोघे एकत्र यावेत अशा प्रतिक्रिया देखील मराठी चित्रपट रसिकांमध्ये उमटल्या. त्यानंतर काही तासांतच हे दोघे एकत्र येत असल्याची बातमी येवून धडकली आहे. प्रसाद आणि स्वप्नील हे आगामी ‘सुशीला-सुजीत’ या चित्रपटातून एकत्र येत आहेत.

प्रसाद ओकने इंस्टाग्रामवर एक पोस्ट टाकून स्वप्नील जोशीचं कौतुक केलं होतं. ‘नवरा माझा नवसाचा २’ नुकताच प्रदर्शित झाला असून चित्रपटाने ब्लॉकबस्टर कमाई केली आहे. त्यामुळे प्रसादने स्वप्नीलचं कौतुक केलं आणि पाठोपाठ स्वप्नीलने देखील प्रसादला त्याच्या २७ सप्टेंबर रोजी प्रदर्शित झालेल्या 'धर्मवीर २’साठी खास शुभेच्छा दिल्या होत्या. स्वप्नील जोशी आणि प्रसाद ओक हे अभिनयाच्या पलीकडे जाऊन एकमेकांचे खास मित्र आहेत. आता हे मित्र मोठ्या पडद्यावर एकत्र दिसणार आहेत. 'सुशीला- सुजीत' या चित्रपटात ते एकत्र दिसणार आहेत. बिग ब्रेन प्रॉडक्शन्स आणि पंचशील एन्टरटेन्मेंट्स यांची निर्मिती असलेल्या ‘सुशीला-सुजीत’ या चित्रपटातील कलाकारांची नावे अद्याप तरी गुलदस्त्यात ठेवण्यात आली आहेत.

प्रसाद ओक, स्वप्नील जोशी, सिनेमॅटोग्राफर संजय मेमाणे हे पहिल्यांदाच एकत्र येवून चित्रपटाची निर्मिती करणार आहेत. प्रसाद ओक हा चित्रपटाचा दिग्दर्शक आहे तर संजय मेमाणे हे सिनेमॅटोग्राफर असून हे एक यशस्वी कॉम्बिनेशन मानलं जातंय . स्वप्नील जोशी, प्रसाद ओक, संजय मेमाणे यांच्यासह मंजिरी ओक आणि निलेश राठी यांची सुद्धा ही एकत्रित निर्मिती आहे. पटकथा-संवाद अजय कांबळे यांचे आहेत. चित्रपट २०२५ मध्ये प्रदर्शित होणार आहे. “या चित्रपटाचे नाव जरी ‘सुशीला-सुजीत’ असले तरी हे नाव ऐकण्या किंवा वाचण्यापेक्षा बघण्यात खूप गंमत आहे. त्याचे विज्युअल गमतीशीर आहेत. ती काय गंमत आहे ते तुम्हाला त्याचे पोस्टर बघून कळते,' असं स्वप्नील म्हणाला आहे.

अनेक मराठी, हिंदी चित्रपट आणि मालिका यांमधून दमदार भूमिका करणारा स्वप्नील आज आघाडीचे कलाकार म्हणून ओळखला जातो. त्यांने या आधीही काही चित्रपटांची निर्मिती केली आहे. दुनियादारी, मुंबई-पुणे-मुंबई, मंगलाष्टक वन्स मोअर, फुगे, रणांगण, वाळवी यांसारख्या मराठी तर गुलाम-ए-मुस्तफा, दिल विल प्यार व्यार, लाईफ जिंदगी यांसारख्या हिंदी चित्रपटांत त्यांनी विविध भूमिका केल्या आहेत.

प्रसाद ओक याने अनेक नाटके, चित्रपट आणि जवळपास मलिकांमध्ये कामे केली आहेत. रमा माधव, बाळकडू, चिरंजीव, फर्झंद, क्षण, ती रात्र, एक डाव धोबीपछाड, हिरकणी, धर्मवीर यांसारखे चित्रपट, पिंपळपान, आभाळमाया, हम तो तेरे आशिक है, क्राईम पॅट्रोल यांसारख्या मालिकांमध्ये त्यांनी काम केले आहे. कच्चा लिंबू, हिरकणी, चंद्रमुखी, वडापाव या चार चित्रपटांचे त्यांनी दिग्दर्शन केले आहे. वाडा चिरेबंदी, मग्न तळ्याकाठी, बेचकी, रणांगण, आलटून पालटून यांसारखी नाटके केली आहेत.