Ranbir Kapoor about Rishi Kapoor : अभिनेता रणबीर कपूर सध्या बॉलिवूडमधील आघाडीचा अभिनेता म्हणून ओळखला जातो. त्याच्या अभिनयाची अनेकांनी तारीफ केली आहे. प्रत्येक सिनेमातील त्याचा कस लावणारा अभिनय सगळ्यांचं लक्ष वेधून घेतो. नुकतंच रणबीरने दिलेल्या मुलाखतीमध्ये वडिलांच्या मृत्यूनंतर त्याच्यावर काय परिणाम झाला ही गोष्ट शेअर केली.

रणबीरने नुकतीच निखिल कामथच्या पीपल टीव्ही युट्युब चॅनेलवरील पॉडकास्ट शोमध्ये हजेरी लावली. यावेळी त्याने पहिल्यांदाच त्याचे वडील आणि दिग्गज अभिनेते ऋषी कपूर यांच्याशी त्याचं असलेलं नातं, त्यांच्या मृत्यूचा त्याच्यावर झालेला परिणाम आणि ज्यादिवशी ही घटना घडली तो दिवस यावर भाष्य केलं.

रणबीर म्हणाला कि,"तुला ही ऐकायला थोडी गंमत वाटेल पण माझ्या वडिलांचं निधन झालं तेव्हा मी रडलो नाही. मी अजूनही त्याबद्दल व्यक्त झालो नाही आहे किंवा मला अजूनही शोक नेमका कसा व्यक्त करायचा हे समजलं नव्हतं. त्यांचं निधन झालं त्याच्या बरोबर आदल्या रात्री डॉक्टरांनी मला याबद्दल सांगितलं होतं. ‘त्यांची ही शेवटची रात्र आहे…त्यांचं कधीही निधन होऊ शकतं’ डॉक्टरांचे ते शब्द ऐकून मला काहीच सुचत नव्हतं. मला आठवतंय मी एका खोलीत गेलो होतो. मला पॅनिक अटॅक आला होता. नेमकं मला आपलं दु:ख कसं व्यक्त करायचं हे माहीत नव्हतं. त्यानंतर मग आयुष्यात माझं किती मोठं नुकसान झालंय याची जाणीव मला झाली"

वडिलांबरोबरच्या बॉण्डिंगविषयी रणबीर म्हणाला कि,"आमचं बॉण्डिंग कधीच चांगलं नव्हतं, आम्हाला एकमेकांविषयी प्रेम होत पण आम्ही कधीच व्यक्त केलं नाही. माझ्या वडिलांनी उपचारावेळी बराच काळ न्यूयॉर्कमध्ये घालवला. त्यावेळी आम्ही पूर्ण कुटूंब एकत्र होतो. मी त्यांच्याबरोबर ४५ दिवस राहिलो होती. त्यावेळी एके दिवशी ते माझ्या खोलीत आले आणि रडू लागले. या आधी ते कधीच असं वागले नव्हते. त्यामुळे मला त्यांच्याशी कस वागावं हे कधीच कळलं नाही. त्यांना मिठी मारावी की नाही हे सुद्धा मला माहिती नव्हतं. त्यावेळी आमच्यात किती अंतर आहे याची मला जाणीव झाली. त्यादिवशी मला खूप जास्त अपराधी वाटलं कारण आमच्यातील अंतर मी कमी करू शकलो नाही. "

३० एप्रिल २०२० ला ऋषी कपूर यांचं कॅन्सरमुळे निधन झालं. गेला बराच काळ त्यांच्यावर उपचार सुरु होते.