Gurucharan Singh: छोट्या पडद्यावरील तारक मेहता का उल्टा चष्मा (Taarak Mehta Ka Ooltah Chashmah) फेम सोढी म्हणजेच अभिनेता गुरुचरण सिंह (Gurucharan Singh) गेल्या चार दिवसापासून म्हणजेच 22 एप्रिलपासून बेपत्ता आहे. पोलीस यासंदर्भांत तपास करत असून त्यांच्या हाती आता महत्त्वाची माहिती लागल्याचं समोर आलंय. पोलिसांच्या हाती सीसीटीव्ही फुटेज लागलं असून आता हे अपहरणाचं प्रकरण असू शकतं असा पोलिसांचा अंदाज आहे.

पोलिसांच्या हाती पालम परिसरातील परशुराम चौकातील सीसीटीव्ही फुटेज लागलं असून रात्री 9:14 वाजता गुरुचरण बॅग घेऊन त्या रस्त्याने जात असलेला या सीसीटीव्ही फुटेजमध्ये पाहायला मिळतोय पण यानंतर तो कुठे गेला याचा आता पोलीस तपास करत आहेत. तसेच गेल्या काही दिवसांपासूनचे त्याचे आर्थिक व्यवहारही संशयास्पद असल्याचं पोलिसांचं म्हणणं असल्याचं इंडिया टुडेने दिलेल्या वृत्तात सांगितलं आहे. गुरुचरणने गेल्या काही काळात अनेक आर्थिक व्यवहार केले असून याबाबतची माहिती जाणून घेण्याचा पोलीस प्रयत्न करत आहेत. तसंच त्याचा फोनही बंद येत असून 24 एप्रिलपर्यंत त्याचा फोन सुरु असल्याचं पोलिसांचं म्हणणं आहे.

गुरुचरण काही कामानिमित्त मुंबईला जाणार होता. त्याने याबाबत त्याच्या मित्रांना कळवलं होतं. 22 एप्रिलला सकाळी तो घरातून फ्लाईट पकडण्यासाठी निघाला. रात्री साडेआठ वाजता त्याची फ्लाईट होती पण तो विमानात बसलाच नाही हे आता पोलीस तपासात समजलं. त्याची मैत्रीण भारती सोनी त्याला घ्यायला एअरपोर्टवर पोहोचली पण पोहोचलाच नसल्याचं तिच्या लक्षात आलं. गुरुचरणचे वडील हरगीत सिंह यांनी पोलिसात याबाबत तक्रार दाखल केली असून पोलिसांनी गुरुचरण यांना शोधण्याचं आश्वासन त्यांना दिलं आहे.

गुरुचरण यांच्या आई -वडिलांचं वय जास्त असून ते गेल्या बराच काळापासून आजारी असतात. गुरुचरणची आई खूप आजारी असतात, त्या रुग्णालयात दाखल होत्या, पण आता ठीक आहे. पण अचानक तो बेपत्ता झाल्याने घरचे चिंतेत आहेत. पोलिसांवर पूर्ण विश्वास असून ते त्याला शोधून काढतील, असा विश्वास कुटुंबाला आहे. तर मुंबईतील त्याच्या मित्रांना सुद्धा याबाबत माहिती देण्यात आल्याचं सूत्रांनी सांगितलं आहे. २०२० मध्ये आई-वडिलांची सेवा करण्यासाठी गुरुचरण यांनी 'तारक मेहता...' शो ला रामराम केला.