5 Minutes Microwave Recipes

साहित्य

पाव कप मैदा, पाव टीस्पून बेकिंग पावडर, चिमूटभर बेकिंग सोडा, १ टेबलस्पून ऑलिव्ह ऑईल, ३ टेबलस्पून दूध, मीठ चवीनुसार, २ टीस्पून पिझ्झा सॉस, ४ टेबलस्पून किसलेले चीज, ४-५ ऑलिव्ह फळे, चिमूटभर चिलीफ्लेक्स व ड्राय ओरेगानो.

कृती

एका मायक्रोवेव्ह सेफ मगमध्ये मैदा, बेकिंग पावडर व सोडा, दूध, ऑलिव्ह ऑईल व मीठ घालून एकजीव करावे. त्यावर आवडीप्रमाणे पिझ्झा सॉस व चीज घालावे.

ऑलिव्ह फळे, चिलीफ्लेक्स व ओरेगानो घालून मायक्रोवेव्ह ओव्हनमध्ये हाय टेम्परेचरवर दोन मिनिटे ठेवावे. झटपट पिझ्झा तयार. लगेच खावयास द्यावा.

पौष्टिक ढोकळा

इन मग वाढप एका व्यक्तीसाठी

साहित्य

पाव कप बेसन, पाऊण कप नाचणी पीठ, अर्धा कप दही, १ टेबलस्पून लसूण-हिरव्या मिरच्या व आले पेस्ट, पाव टीस्पून हळद, चिमूटभर हिंग, मीठ स्वादानुसार, १ टेबलस्पून तेल, अर्धा टीस्पून पिठीसाखर, २ टीस्पून फ्रूट सॉल्ट, पाणी जरुरीप्रमाणे,

फोडणीसाठी १ टीस्पून तेल, १ टीस्पून राई, पाव टीस्पून जिरे, २ हिरव्या मिरच्यांचे बारीक तुकडे, ४-५ कढीपत्ता पाने, कोथिंबीर (सजावटीसाठी).

कृती

काचेच्या बाऊलमध्ये बेसन, नाचणी पीठ घेऊन एकजीव करावे. जरुरीप्रमाणे पाणी घालून मऊसर मिश्रण करावे. फ्रूट सॉल्ट घालून हळूवार ढवळावे. मायक्रोवेव्ह सेफ मगमध्ये हे मिश्रण ओतावे. ओव्हनमधे १८० डिग्री सेंटिग्रेडवर चार मिनिटे ठेवावे.

तपासून बघावे. ढोकळा फुगून आला पाहिजे. गॅसवर पॅनमध्ये तेल घालून खमंग फोडणी करून ढोकळ्यावर ओतावी. कोथिंबिरीने सजवून लगेच खावयास द्यावा.

टोमॅटो चटणी

वाढप ४ व्यक्तींसाठी

साहित्य

एक कप टोमॅटोचे बारीक तुकडे, १ टेबलस्पून साखर, एका लाल सुक्या मिरचीचे बारीक तुकडे, आल्याचे २-३ तुकडे, ७-८ भिजलेले बेदाणे, पाव टीस्पून पंचफोरन मसाला, मीठ स्वादानुसार, १ टीस्पून राई तेल.

कृती

काचेच्या बाऊलमध्ये तेल घालून मायक्रोवेव्हमध्ये अर्धा मिनिट ठेवावे. त्यात टोमॅटोचे तुकडे पंचफोरन मसाला व मीठ घालून तीन मिनिटे मायक्रोवेव्हमध्ये ठेवावे.

मधे मधे ढवळत राहावे. मग बेदाणे, मिरची, आल्याचे तुकडे व साखर घालून पुन्हा दोन मिनिटे ठेवावे.

मिक्स फ्रूट जॅम

वाढप २ व्यक्तींसाठी

साहित्य

दोन कप सफरचंद, द्राक्षे इत्यादी आवडीच्या फळांचे तुकडे, पाव कप साखर, १ टीस्पून लिंबू रस, कणभर मीठ, चिमूटभर लवंग-दालचिनी पूड.

कृती

काचेच्या बाऊलमध्ये फळांचे तुकडे व साखर घालून ओव्हनमधे हाय टेम्परेचरवर दोन मिनिटे ठेवावे. बाऊल बाहेर काढून, ढवळून पुन्हा तीन मिनिटे ठेवावे. नंतर बाऊल बाहेर काढून लिंबू रस व दालचिनी पूड घालून एकजीव करावे. चविष्ट जॅम तयार.

बटरस्कॉच केक

इन मग वाढप एका व्यक्तीसाठी

साहित्य

चार टेबलस्पून मैदा, २ टेबलस्पून पिठीसाखर, चिमूटभर बेकिंग पावडर व बेकिंग सोडा, १ टेबलस्पून तेल, ४ टेबलस्पून दूध, २ थेंब बटरस्कॉच इसेन्स, २ थेंब ऑरगॅनिक खायचा पिवळा रंग.

कृती

एका मायक्रोवेव्ह सेफ मगमध्ये वरीलपैकी प्रथम कोरडे जिन्नस मिक्स करावेत. नंतर ओले जिन्नस घालून एकजीव करावे. मायक्रोवेव्हमध्ये मग दोन मिनिटे ठेवावा.

दोन मिनिटांनंतर तपासून पाहावे. केक फुगून आला पाहिजे. केक फुगला की तयार झाला असे समजावे.