सध्या नवरात्रीचे दिवस सुरु आहेत. या दिवसांत अनेकांचे नऊ दिवसांचे उपवास असतात. या उपवासात देखील पौष्टिक पदार्थ खाणे गरजेचे आहे. त्यासाठीच कोणत्या पदार्थात किती पोषणमूल्य आहेत याची माहिती...

राजगिरा

पोषणमूल्ये - प्रथिने - ४३ टक्के, कर्बोदके - ३२ टक्के, स्निग्ध पदार्थ - ५ टक्के

राजगिरा हा उपवासाच्या पदार्थांमधील एक महत्त्वाचा घटक आहे. लहानांपासून मोठ्यांपर्यंत सगळेच राजगिऱ्याचे लाडू, चिक्की खातात. राजगिरा पचायला एकदम हलका असतो आणि तत्काळ शरीराला बळ देतो.

यामध्ये प्रथिने सर्वाधिक प्रमाणात आढळतात. प्रोटीनचा उत्तम पर्याय म्हणून राजगिऱ्याचा आहारामध्ये समावेश केला जाऊ शकतो. राजगिरा बियांमध्ये फायटोस्टेरॉल असते, जे कोलेस्ट्रॉलची पातळी कमी करण्यास मदत करते. तसेच शरीरातील साखरेची पातळी नियंत्रित ठेवते. त्यामुळे बीपी नियंत्रित ठेवण्यास मदत होते. हृदयविकाराचा धोकाही कमी होतो.

वरी

पोषणमूल्ये - प्रथिने - १०.६ टक्के, कर्बोदके - ७३.४ टक्के, स्निग्ध पदार्थ - ४.० टक्के, तंतुमय पदार्थ - ६.७ टक्के. तसेच लोह, मॅग्नेशियम, फॉस्फरस हेसुद्धा मुबलक प्रमाणात आढळते.

वरीचा तांदूळ हा उपवासासाठी संपूर्ण भारतात वापरला जातो. हा तांदूळ पचायला हलका असतो. वरी खाल्ल्याने बद्धकोष्ठतेचा त्रास असेल तर तो दूर होतो. गॅसेस होत नाहीत आणि अपचनामुळे पोट दुखत असेल, तर तेसुद्धा दुखायचे कमी होते.

शाकाहारी लोकांसाठी लोहाचा महत्त्वाचा स्रोत म्हणून वरी ओळखले जाते. ‘लो ग्लायसेमिक इंडेक्स’ असलेल्या या अन्नामुळे रक्तातील साखर नियंत्रणात राहते. मधुमेह असणाऱ्या लोकांना वरी खाणे फायदेशीर असते.