पुणे - पुणे जिल्ह्यात (Pune District) रविवारी (ता. १६) सलग तिसऱ्या दिवशी एका दिवसात दहा हजारांहून अधिक नवीन कोरोना रुग्ण (Corona Patients) आढळून आले आहेत. शनिवारी (ता. १५) जिल्ह्यात १० हजार २८१ नवे कोरोना रुग्ण सापडले होते. हाच आकडा शुक्रवारी (ता.१४) दहा हजार ७६ इतका होता. जिल्ह्यात रविवारी दिवसभरात १० हजार १०२ नवे रुग्ण आढळून आले आहेत. यामध्ये पुणे शहरातील ५ हजार ३७५ जण आहेत.

याऊलट सलग दुसऱ्या दिवशी दिवसातील नवीन रुग्णांच्या तुलनेत निम्‍याहून कमी कोरोनामुक्त झाले आहेत. रविवारी ५ हजार ४०५ जण कोरोनामुक्त झाले आहेत. शिवाय रविवारी कोरोना रुग्णांच्या मृत्यूमध्ये वाढ झाली आहे. जिल्ह्यात दिवसांत आठ जणांचा मृत्यू झाला आहे. मृत्यूची हीच संख्या शनिवारी (ता.१५ ) पाच होती. जिल्हा परिषदेच्या जिल्हा आरोग्य विभागाच्यावतीने प्रसिद्ध करण्यात आलेल्या कोरोना आकडेवारीच्या अहवालातून हे उघड झाले आहे.

जिल्ह्यातील दिवसातील एकूण नवीन रुग्णांमध्ये पुणे शहरातील सर्वाधिक रुग्णांबरोबरच पिंपरी चिंचवडमध्ये २ हजार ६२६, जिल्हा परिषद कार्यक्षेत्रात १ हजार ५०५, नगरपालिका हद्दीत ३८४, कॅंटोन्मेंट बोर्ड क्षेत्रात २१२ नवे कोरोना रुग्ण सापडले आहेत. दिवसातील एकूण कोरोनामुक्तांमध्ये पुणे शहरातील ३ हजार ९०, पिंपरी चिंचवडमधील १ हहजार५३५, जिल्हा परिषद कार्यक्षेत्रातील ५८८, नगरपालिका हद्दीतील १६१ आणि कॅंटोन्मेंट बोर्ड क्षेत्रातील ३१ जण आहेत. दिवसातील एकूण कोरोना मृत्यूमध्ये पुणे शहरातील पाच, पिंपरी चिंचवडमधील एक आणि जिल्हा परिषद कार्यक्षेत्रातील दोन मृत्यू आहेत.