Death of 11 year old while playing cricket : देशात सध्या इंडियन प्रीमियर लीग सुरू आहे. यादरम्यान पुण्यातून एक धक्कादायक बातमी समोर आली आहे. शहरातील लोहगाव परिसरात मित्रांसोबत क्रिकेट खेळताना गुप्तांगावर चेंडू लागल्याने एका चिमुरड्याचा मृत्यू झाला आहे. या प्रकाराने एकच खळबळ उडाली आहे.

मिळालेल्या माहितीनुसार, पुण्यातील लोहगाव भागात ही घटना घडली. शौर्य ऊर्फ शंभू कालिदास खांदवे, असं मृत्यू झालेल्या ११ वर्षीय मुलाचं नाव आहे. या घटनेमुळे परिसरात हळहळ व्यक्त केली जात आहे,

पुण्यातील लोहगाव भागात शंभू हा शाळेला उन्हाळी सुट्या असल्यामुळे गुरुवारी संध्याकाळी मित्रांसोबत क्रिकेट खेळत होता. यादरम्यान मित्रांसोबत खेळतांना चेंडू शंभुच्या गुप्तांगावर लागला आणि तो मैदानावर कोसळला.

काही वेळानंतर तो उठून उभा राहिला. मात्र , वेदना असह्य झाल्यामुळे तो परत मैदानावर कोसळला. तो खाली पडताच त्याच्या मित्रांनी आरडाओरडा केला. तिथे असलेल्या नागरिकांनी शंभूला खाजगी रुग्णालयात दाखल केले. मात्र डॉक्टरांनी तपासणी केल्यानंतर शंभूला मृत घोषित करण्यात आले. याप्रकरणी विमानतळ पोलीस ठाण्यात आकस्मिक मृत्यूची नोंद करण्यात आली आहे.