पुणे : सायबर चोरट्यांनी विविध प्रकारचे आमिष दाखवत वेगवेगळ्या घटनांमध्ये नागरिकांना १५ लाख ८५ हजार रुपयांचा गंडा घातला. याबाबत कोथरूड पोलिस ठाण्यात दोन आणि विमानतळ पोलिस ठाण्यात एक गुन्हा दाखल आहे.एका युवकाने दिलेल्या फिर्यादीनुसार काही दिवसांपूर्वी त्यांना चोरट्यांनी फोनवर संपर्क केला. दिल्लीतील एका खासगी आयुर्विमा कंपनीतून बोलत असून तुमच्या पॉलिसीचे दोन हप्ते बाकी आहे. हप्ते भरल्यास ११ लाख ४० हजार रुपये मिळतील, असे आमिष सायबर चोरट्यांनी तक्रारदाराला दाखविले होते.(Cyber thieves lure citizens)

तक्रारदाराला एका बँक खात्यात चोरट्यांनी दोन लाख ९० हजार रुपये जमा करण्यास सांगितले. त्यानंतर चोरट्यांनी मोबाईल क्रमांक बंद केल्याचे निदर्शनास आल्यानंतर तक्रारदाराने नुकतीच पोलिसांकडे तक्रार दिली. गुन्हे शाखेचे पोलिस निरीक्षक बाळासाहेब बढे या गुन्ह्याचा तपास करत आहेत.आयुर्विमा पॉलिसीची रक्कम परत मिळवून देण्याच्या आमिषाने कोथरूडमधील एका ज्येष्ठ महिलेला चोरट्यांनी सात लाख ३५ हजार रुपयांचा गंडा घातला. याबाबत महिलेने कोथरूड पोलिस ठाण्यात फिर्याद दिली आहे. चोरट्यांनी दिल्लीतील आयुर्विमा कंपनीतून बोलत असल्याची बतावणी केली होती. पॉलिसी सुरू ठेवण्यासाठी तातडीने हप्ते भरा. हप्ते भरल्यास ३१ लाख रुपये मिळतील, असे आमिष चोरट्यांनी दाखवून महिलेच्या बँक खात्याची गोपनीय माहिती घेतली. या माहितीचा गैरवापर करून चोरट्यांनी महिलेच्या खात्यातून रोकड लांबविली.(cyber news)

तिसऱ्या घटनेत चोरट्यांनी एका युवकाला परदेशात नोकरीच्या आमिषाने पाच लाख ६० हजार रुपयांचा गंडा घातला. याबाबत एका युवकाने विमानतळ पोलिस ठाण्यात फिर्याद दिली आहे. तक्रारदाराला कॅनडातील एका कंपनीत नोकरी लावण्याचे आमिष चोरट्यांनी दाखविले होते. चोरट्यांनी वेळोवेळी त्याच्याकडून पाच लाख ६० हजार रुपये घेतले. फसवणूक झाल्याचे निदर्शनास आल्यानंतर युवकाने नुकतीच पोलिसांकडे तक्रार दिली. सहायक पोलिस निरीक्षक एल. एस. उर्किडे तपास करीत आहेत.(cyber crime)