पुणे : ‘सकाळ माध्यम समूहा’तर्फे येत्या ऑगस्टमध्ये पुण्यात तिसऱ्या दोनदिवसीय सहकार महापरिषदेचे (सकाळ महाकॉन्क्लेव्ह-२०२४) आयोजन केले आहे. या महापरिषदेच्या उद्‍घाटनप्रसंगी सहकार क्षेत्रातील मान्यवर उपस्थित राहणार आहेत. लोकमान्य मल्टीपर्पज को-ऑपरेटिव्ह सोसायटी प्रस्तुत सहकार महापरिषदेत सहकारी बँकिंग, पतसंस्था, साखर उद्योग आणि डेअरी उद्योगासमोरील आव्हाने व उपाययोजनांबाबत विस्तृत चर्चा होणार आहे. महापरिषदेत केंद्र आणि राज्यातील धोरणकर्त्यांशी थेट संवाद साधता येणार आहे.

‘सकाळ माध्यम समूहा’ने यापूर्वी दोन ऑक्टोबर २०२१ आणि १७ व १८ फेब्रुवारी २०२३ रोजी सहकार महापरिषदेचे आयोजन केले होते. फेब्रुवारी २०२३ मध्ये आयोजित सहकार महापरिषदेस केंद्रीय सहकार मंत्री अमित शहा, माजी केंद्रीय कृषी मंत्री शरद पवार, माजी केंद्रीय मंत्री सुरेश प्रभू, तत्कालीन केंद्रीय अर्थ राज्यमंत्री डॉ. भागवत कराड, मुख्यमंत्री एकनाथ शिंदे, उपमुख्यमंत्री देवेंद्र फडणवीस, उच्च व तंत्र शिक्षण मंत्री चंद्रकांत पाटील, तत्कालीन सहकार मंत्री अतुल सावे यांच्यासह सहकार क्षेत्रातील मान्यवर उपस्थित होते. यंदाच्या सहकार महापरिषदेतही केंद्र आणि राज्यातील मान्यवरांना निमंत्रित करण्यात येत आहे.

‘सकाळ माध्यम समूहा’ने नागरी सहकारी बँकिंग, पतसंस्था, साखर उद्योग क्षेत्रातील प्रश्नांवर चर्चा घडवून त्याचा सातत्याने पाठपुरावा केला आहे. त्यामुळे साखर कारखान्यांचा प्राप्तिकर माफ होण्यासह सहकारी बॅंकिग आणि पतसंस्थांचे विविध प्रश्न मार्गी लागण्यास मदत झाली आहे. याच पार्श्‍वभूमीवर यंदा पुण्यामध्ये तिसऱ्या सहकार महापरिषदेचे आयोजन केले आहे.