भोर (पुणे) - अनंतनगर-निगडे (ता. भोर) येथील राजगड सहकारी साखर कारखान्याच्या निवडणूकीसाठी 43.96 टक्के मतदान झाले. 13 हजार 618 मतदारांपैकी केवळ 5 हजार 987 मतदारांनी मतदानाचा हक्क बजावला. यामध्ये 667 महिला मतदार आणि 5 हजार 320 पुरुष मतदारांचा समावेश आहे. महिला मतदारांची टक्केवारी 41.10 तर पुरुष मतदारांची टक्केवारी 44.38 आहे.कारखान्याच्या तीन गटांमधील ७ जागांसाठी रविवारी (ता. 29) मतदान प्रक्रीया शांततेत पार पडली आणि ११ उमेदवारांचे भवितव्य मतपेटीत बंद झाले.

कारखान्याच्या भोर, वेल्हे व खंडाळा (जि. सातारा) तालुक्यातील 29 मतदानकेंद्रांवर रविवारी सकाळी 9 वाजता मतदान सुरु झाले. सुरुवातीला मतदारांनी मतदान केंद्राकडे पाठ फिरवली. पहिल्या दोन तासात केवळ साडेसहा टक्के मतदान झाले. त्यानंतर उमेदवारांनी आणि राजकीय पक्षाच्या कार्यकर्त्यांनी मतदारांना मतदान केंद्रांवर घेऊन जाण्यासाठी गाडीची व्यवस्था केली. त्यामुळे मतदानाच्या टक्केवारीत वाढ झाली. दुपारी 12 वाजता 19 टक्के मतदान झाले. तर दोन वाजता 31 टक्के मतदान झाले. आणि सायंकाळी 5 वाजता 43.96 टक्के मतदान झाले. आळंदे येथील मतदान केंद्रावर मतदानासाठी रांगा लागल्या होत्या. राजकीय पक्षांचे कार्यकर्ते मतदारांना मतदारांना मतदान करण्यासाठी मार्गदर्शन करीत होते. विठ्ठल बळीराम बुदगुडे (वय 55) या अपंग मतदाराला सत्ताधारी कॉग्रेसच्या कार्यकर्त्यांनी गाडीतून आणून उचलून आळंदेतील मतदान केंद्रावर नेले. केवळ विरोधकच नव्हे तर सत्ताधारी कॉग्रेस पक्षाचे उमेदवार हे काही मतदारांपर्यंत पोहोचले नसल्यामुळे मतदानाची टक्केवारी कमी झाली आहे.

रामचंद्र पर्वती कुडले(राष्ट्रवादी), सुभाष मारुती कोंढाळकर(कॉग्रेस), उत्तम नामदेव थोपटे(कॉग्रेस), सुधीर चिंतामण खोपडे(कॉग्रेस), पंडीत रघुनाथ बाठे(राष्ट्रवादी), विलास अमृतराव बांदल(भाजपा), सोमनाथ गणपत वचकल(कॉग्रेस), पोपटराव नारायण सुके(कॉग्रेस). रामदास किसन गायकवाड(राष्ट्रवादी), दिनकर सोनबा धरपाळे(कॉग्रेस) आणि प्रताप धोंडीबा शिळीमकर(कॉग्रेस) हे उमेदवार निवडणूकीत आपले नशीब आजमावणार आहेत. भोरमधील औद्योगीक प्रशिक्षण संस्थेमध्ये (आयटीआय) मंगळवारी (ता. 31) सकाळी 9 वाजल्यापासून मतमोजणीस सुरुवात होणार असल्याचे निवडणूक निर्णय अधिकारी राजेंद्र कचरे यांनी सांगितले.