पुणे : दान केलेल्या अवयवामुळे पाच जणांना जीवदान देण्यात वैद्यकीय तज्ज्ञांना मंगळवारी यश आले. त्यात पुण्यातील तीन आणि हैदराबाद येथील दोन रुग्ण आहेत.

हे वाचा - चला भटकायला ; पुण्यातले किल्ले, ऐतिहासिक वास्तू खुल्या 

मेंदूमध्ये रक्तस्राव झालेल्या 47 वर्षीय महिलेला उपचारासाठी पुण्यातील एका खासगी रुग्णालयात दाखल करण्यात आले. त्यांचे प्राण वाचविण्यासाठी डॉक्‍टरांनी शर्थीचे प्रयत्न केले. मात्र, रुग्णाने उपचारांना प्रतिसाद दिला नाही. त्यामुळे त्यांचे मेंदूचे कार्य थांबले. त्यावेळी रुग्णालयातील वैद्यकीय सामाजिक कार्यकर्त्यांनी त्यांच्या पतीला अवयव दानाबाबत आवाहन केले. या आवाहनाला रुग्णाच्या नातेवाइकांनी प्रतिसाद दिल्याने अवयव दान करता आले, अशी माहिती पुण्याच्या झोनल ट्रान्सप्लॅंट को-ऑर्डिनेश कमिटीच्या (झेडटीसीसी) समन्वयक आरती गोखले यांनी दिली.

पुण्यातील इतर बातम्या वाचण्यासाठी क्लिक करा

ब्रेन डेड झालेल्या रुग्णाची दोन्ही मूत्रपिंडे, हृदय, यकृत आणि फुफ्फुस दान करण्यात आले. सह्याद्री रुग्णालयातील रुग्णावर यकृत प्रत्यारोपण करण्यात आले. तर, हृदय आणि फुफ्फुस हैदराबाद येथे पाठविण्यात आले. एक मूत्रपिंड पुण्यात तर, दुसरे नाशिकमधील रुग्णांना प्रत्यारोपित केले. त्यामुळे एका महिलेने जगाचा निरोप घेताना पाच जणांना नवीन जीवन दिले, असेही त्यांनी स्पष्ट केले.