लोणी काळभोर (पुणे) : हवेली तालुक्याच्या विविध भागात कोरोनाने सलग दुसऱ्या दिवशी धुमाकूळ घालणे सुरूच ठेवले आहे. तालुक्यात शुक्रवारी (ता. ३) सलग दुसऱ्या दिवशी कोरोनाबाधित रुग्णांच्या संख्येने पन्नाशीचा आकडा गाठला आहे. त्यामुळे तालुक्यातील अॅक्टीव्ह कोरोना रुग्णांची संख्या दोनशे सत्तरवर झाली आहे. रुग्णांच्या दुप्पट वाढीचा वेग अकरा दिवसांवरून नऊ दिवसांवर आला असल्याची माहिती हवेली पंचायत समितीचे आरोग्य अधिकारी डॉ. सचिन खरात यांनी दिली. 

मराठमोळ्या रीवाचा जागतिक गौरव

आरोग्य विभागाने दिलेल्या माहितीनुसार, शुक्रवारी दिवसभरात मांजरी बुद्रुक (१६), नऱ्हे (६), देहू (३), नांदेड (५), न्यू कोपरे (३), खानापूर (१), लोणी काळभोर (४), निरगुडी (१), खडकवासला (४), किरकिटवाडी (१), मांजरी खुर्द (२), वडकी (२) व उरुळी कांचन (२) या तेरा ग्रामपंचायत हद्दीत कोरोनाचे 50 रुग्ण आढळून आले आहेत. दिवसभरात सहा रुग्णांना उपचारानंतर घरी सोडण्यात आले आहे. त्यात थेऊर ग्रामपंचायत हद्दीतील चार जणांचा समावेश आहे. 

कोरोनामुक्त रुग्ण घरी परतल्यावर स्वागत करताय तर... 

हवेली तालुक्यात शुक्रवारी दिवसभरात आढळून आलेल्या पन्नास कोरोना रुग्णांपैकी तब्बल पन्नास टक्क्यांहूनही अधिक रुग्ण हे पूर्व हवेलीतील केवळ पाच गावातील आहेत. मांजरी बुद्रुक (सोळा), लोणी काळभोर ( चार), मांजरी खुर्द (दोन), वडकी (दोन) व उरुळी कांचन (दोन) या पाच गावांतच सव्वीस रुग्ण आढळून आले आहेत. त्यामुळे पूर्व हवेली सलग चौथ्या दिवशी हॉटस्पॉटवर राहिली आहे. मागिल सात दिवसांचा विचार केल्यास मांजरी बुद्रुक (५४), लोणी काळभोर (१२), कुंजीरवाडी (१०), कदमवाकवस्ती (१३), शेवाळवाडी (१३) व उरुळी कांचन (८) या ग्रामपंचायत हद्दीतील अॅक्टीव्ह कोरोना रुग्णांची संख्या धाकधूक वाढवणारी आहे.

कोरोनामुळे अनेक व्यवसाय अडचणीत, पण हा व्यवसाय तेजीत

दरम्यान, आरोग्य विभाग, ग्रामपंचायत प्रशासन व पोलिस खाते नागरिकांना काळजी घेण्याबाबत वारंवार आवाहन करत आहे. मात्र, तरीही नागरिक आपल्याच धुंदीत वावरत असल्याचे दिसून येत आहे.