पुणे : यंदाच्या गणेशोत्सवावर कोरोनाचे सावट आहे. त्यातच शहरामध्ये रक्ताचा तुटवडा जाणवत आहे. हा प्रश्‍न लक्षात घेत पुन्हा एकदा गणेशोत्सव मंडळे रुग्णांच्या मदतीसाठी धावून आले. विधायक कार्याला प्रोत्साहन देणाऱ्या 51 गणेशोत्सव मंडळांनी 16 ठिकाणी एकाचवेळी 'विघ्नहर्ता रक्तदान महायज्ञ' राबविले. त्यामध्ये तब्बल पावणे आठशे कार्यकर्त्यांनी रक्तदान करीत सामाजिक जाणीव अधिक प्रगल्भ केली. त्याचबरोबर शहरातील रुग्णांना रक्त कमी पडू देणार नसल्याची 'श्री'चरणी शपथ घेतली. 

- वीजमीटर रिडींग पाठविण्यासाठी महावितरणने वाढवली मुदत; आता २४ तास नव्हे तर...​

कोरोनामुळे यंदा गणेशोत्सव साध्या पद्धतीनेच करण्यावर गणेशोत्सव मंडळांनी भर दिला. मात्र, विधायक कार्याची परंपरा मंडळांनी सुरूच ठेवली. कोरोनाच्या पार्श्‍वभूमीवर रक्ताची कमतरता जाणवू लागल्याने शहरातील 51 गणेशोत्सव मंडळांनी एकत्र येत रविवारी 'विघ्नहर्ता रक्तदान महायज्ञ' आयोजित केला होता. वेगवेगळ्या ठिकाणी मात्र एकाचवेळी हे रक्तदान शिबीर संपन्न झाले. बाजीराव रस्त्यावरील सरस्वती मंदिर शाळेमध्ये सर्व मंडळांचे कार्यकर्ते एकत्र आले होते. तेथे त्यांनी शहराला रक्ताची कमी पडू देणार नाही, अशी शपथ घेतली. यावेळी कार्यकर्त्यांनी रंगावलीच्या माध्यमातून आणि हातात फलक घेऊन रक्तदानाविषयी जनजागृती केली. 

- कोरोनाग्रस्तांसाठी 'ते' इंजेक्‍शन वापरण्यावर 'डीएमईआर'ने घातली बंधने

या उपक्रमासाठी पियुष शाह, शिरीष मोहिते, राहुल कामठे, मयूर पोटे, अमित जाधव, अक्षय माळकर, जयेश पंडित, रोहित धावडे, किरण सोनिवाल, उमेश सपकाळ, प्रितम शिंदे, कुणाल पवार, नितीन शेंडगे, अमोल सारंगकर, रावी किरवे , पृथ्वीराज येलवंडे, विशाल धनवडे, हणू शिंदे, चेतन चव्हाण, गोपाल येमुल, सुनील मारणे, सागर माडचेट्टी व हर्षल परदेशी यांनी परिश्रम घेतले. 

श्री सिद्धिविनायक मित्र मंडळ विश्रांतवाडी, श्री गणेश मित्र मंडळ कोंढवा, युगंधर मित्र मंडळ आनंदनगर, काळ भैरवनाथ, पांगुळ आळी, पोटसुल्या मारुती, नवजवान मंडळ, नवज्योत मित्र मंडळ येरवडा, साईनाथ मंडळ व बालविकास मंडळ बुधवार पेठ, जगोबादादा तालीम मंडळ आदी 51 मंडळांनी या उपक्रमात सहभाग घेतला.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)