पुणे : केंद्रीय माध्यमिक शिक्षण मंडळाच्या (सीबीएससी) शाळांमध्ये दहावी आणि बारावीत शिकणाऱ्या विद्यार्थ्यांची 75 टक्‍क्‍यांपेक्षा जास्त उपस्थिती असली, तरच त्यांना परीक्षा देता येणार आहे. विद्यार्थ्यांच्या उपस्थितीचा आढावा घेऊन अहवाल विभागीय कार्यालयाला सादर करण्याचे आदेश शाळांना दिले आहेत. 

ताज्या बातम्यांसाठी डाऊनलोड करा ई-सकाळचे ऍप

सीबीएससीने नुकतेच दहावी आणि बारावी परीक्षांचे वेळापत्रक जाहीर केले असून, या परीक्षा 15 फेब्रुवारीपासून सुरू होणार आहेत. त्या पार्श्‍वभूमीवर मंडळाने हे परिपत्रक काढले आहे. त्यानुसार कमी उपस्थिती असलेल्या विद्यार्थ्यांची अडचण होणार आहे. 

थोरातांनी उडवली भाजपची टर; म्हणाले 'भाजपची अवस्था...!'

दरम्यान, सीबीएससी परीक्षा नियमावलीतील 13व्या कलमानुसार उपस्थिती कमी असलेल्या विद्यार्थ्यांना परीक्षेला बसता येणार नाही. त्याची आठवण करून देण्यासाठी मंडळाने जुलै महिन्यात परिपत्रक काढले होते. त्यामध्ये विद्यार्थ्यांची उपस्थिती किमान 75 टक्के असावी, अशी सूचना दिली होती. 

सीबीएससीने काही दिवसांपूर्वी परिपत्रक काढून जुलै महिन्यातील पत्राचा संदर्भ दिला आहे. विद्यार्थ्यांची उपस्थिती किती टक्के आहे, याचा आढावा घेण्याचे आदेश शाळांना दिले आहेत. उपस्थिती कमी असलेल्या विद्यार्थ्यांची यादी शाळांना विभागीय कार्यालयांना पाठवावी लागणार आहे. 

या विद्यार्थ्यांना सूट? 

आजारपण, जवळच्या व्यक्तीचे निधन, क्रीडा स्पर्धेतील सहभाग, नैसर्गिक आपत्ती आदी करणांमुळे काही विद्यार्थ्यांची उपस्थिती 75 टक्‍क्‍यांपेक्षा कमी असेल; तर त्यांना 7 जानेवारीपर्यंत याबाबतचे पुरावे सादर करावे लागणार आहेत, असे या परिपत्रकात नमूद केले आहे.