वाघोली : बकोरी - थेऊर या अष्टविनायक महामार्गावर जोगेश्वरी मंदीरा समोर कंटेनर व कार मध्ये समोरासमोर धडक झाली. या धडकेत सात जण जखमी झाले. यातील चौघे जण गंभीर जखमी झाले आहेत. या अपघातात कारच्या पुढील भागाचा चक्काचुर झाला. हा अपघात रात्री सात वाजण्याच्या सुमारास घडला.

पोलीसांनी दिलेल्या माहितीनुसार, दोन्ही वाहनांची समोरासमोर धडक झाली. या धडकेत कारचा चक्काचुर झाला. कार मध्ये सात जण होते. त्यातील चौघे गंभीर जखमी झाले आहेत. गणेश जाधव, विनोद भोजणे, विठ्ठल जोगदंड, हेमंत देसाई अशी रुग्णालयात दाखल केलेल्यांची नावे आहेत. त्यांना वाघोली व खराडी येथील रुग्णालयात दाखल करण्यात आले आहे. या अपघातात कार चालक अडकून पडला होता.

पोलीस व नागरिकांनी त्याला काढून रुग्णालयात दाखल केले. अपघाताची माहिती मिळताच लोणीकंद पोलीस ठाण्याच्या पोलीस निरीक्षक ( गुन्हे ) सीमा ढाकणे कर्मचाऱ्यांसहीत अपघात स्थळी पोहचल्या. नागरिकांच्या मदतीने सर्व जखमींना तातडीने रुग्णालयात दाखल करण्यात आले.

या अपघातामुळे मोठी वाहतूक कोंडी झाली होती. लोणीकंद पोलीस व लोणी वाहतूक विभागाने दोन्ही वाहने बाजूला करून कोंडी दूर केली. जोगेश्वरी मंदिरा समोर वळण आहे. वनविभागाने तेथे संरक्षक जाळी बसविल्याने वळण तीव्र झाले आहे. यामुळे तेथे नेहमी अपघात होत असल्याचे तेथील रहिवासी व माहिती अधिकारी कार्यकर्ते चंद्रकांत वारघडे यांनी सांगितले.