धायरी : सिंहगड पोलिस ठाण्याच्या हद्दीत धायरी येथील जाधवनगर येथे दोन आठवड्यापूर्वी घडलेली खुनाची घटना ताजी असताना काल पुन्हा दुसरी घटना नऱ्हे गावातील झील कॉलेज चौकातील रस्त्यावर रविवारी सायंकाळी साडेसहा वाजण्याच्या सुमारास घडली.

दहा ते बारा जणांच्या टोळक्यांनी पूर्ववैमनस्यातून सुमित वैराट या तरुणावर कोयत्याने सपासप वार केले. यातील तीन आरोपींना ताब्यात घेण्यात आले आहे. यातील दोन आरोपी अल्पवयीन असल्याची माहिती मिळाली आहे. तर बाकी आरोपीचा शोध सुरू आहे. अंगावर वार होत असताना जवळच्या इमारतीत असणाऱ्या एका व्यक्तीने जखमी अवस्थेत सुमितला घरात घेऊन दरवाजा लावल्याने त्याचा जीव वाचल्याची घटना समोर आली आहे.

घटनेनंतर आरोपी तेथून पसार झाले. गंभीर जखमी सुमित याला तात्काळ उपचारासाठी जवळच्या एका खासगी रुग्णालयात दाखल करण्यात आले आहे. घटनेचे वृत्त समजताच सिंहगड रस्ता पोलिस ठाण्याचे वरिष्ठ पोलिस निरीक्षक देविदास घेवारे, पोलिस निरीक्षक (गुन्हे) प्रमोद वाघमारे, सहायक पोलिस निरीक्षक चेतन थोरबोले, पोलिस उपनिरीक्षक नितीन जाधव, कुलदीप संकपाळ या अधिकाऱ्यांनी कर्मचाऱ्यांसह घटनास्थळी धाव घेतली. सिंहगड रस्ता पोलिसांनी घटनेचे सीसीटीव्ही फूटेज प्राप्त करून तीन आरोपींना ताब्यात घेतले तर इतर आरोपींच्या शोधासाठी पथके रवाना झाली आहेत.