किरकटवाडी : कर्जासाठी तारण म्हणून भूखंडाची बनावट कागदपत्रे व बनावट पॅनकार्ड सादर करून नांदेड सिटी येथील टि. एम. बी. बँकेला तब्बल चोवीस लाखांचा गंडा घालून सुमारे तीन वर्षांपासून फरार असलेल्या आरोपीला हवेली पोलिसांनी अटक केली आहे. अटक केलेल्या आरोपीला कोर्टासमोर हजर केले असता एक दिवसाची पोलीस कोठडी सुनावण्यात आली आहे.
समीर संजय मोहिते (रा.506, मोहिते वाडा, हत्ती गणपती जवळ, सदाशिव पेठ, पुणे.) असे अटक करण्यात आलेल्या आरोपीचे नाव आहे. नांदेड (ता. हवेली) येथील टी.एम.बी बँकेच्या शाखेतून 24 लाखांचे कर्ज घेऊन आरोपी समीर मोहिते हा फरार झाला होता. विशेष म्हणजे कर्जासाठी सादर केलेली कागदपत्रे पूर्णपणे बनावट होती. सदर बाब बँकेच्या निदर्शनास आल्यानंतर 2017 साली हवेली पोलीस ठाण्यात गुन्ह्याची नोंद करण्यात आली होती.
बँकेची फसवणूक करून फरार असलेला आरोपी नांदेड फाटा येथे येणार असल्याची गोपनीय माहिती मिळाल्यानंतर हवेली पोलिस ठाण्याचे पोलिस निरीक्षक सदाशिव शेलार यांच्या मार्गदर्शनाखाली सहाय्यक पोलीस निरीक्षक नितीन नम, पोलीस कॉन्स्टेबल गणेश धनवे, राजेंद्र मुंढे, दिपक गायकवाड, चालक महेंद्र चौधरी व होमगार्ड सुशील गाभणे यांच्या पथकाने सापळा रचून समीर मोहिते यास अटक केली. अटक करण्यात आलेल्या आरोपीस कोर्टात हजर करण्यात आल्यानंतर पुढील तपासासाठी एका दिवसाची पोलीस कोठडी सुनावण्यात आली आहे.
बनावट कागदपत्रांच्या आधारे इतर बँकांचीही फसवणूक- टि. एम. बी. बँकेला तारण म्हणून जांभूळवाडी येथील भूखंडाची जी बनावट कागदपत्रे सादर केलेली आहेत त्याच बनावट कागदपत्रांच्या आधारे आरोपी समीर मोहिते याने पुणे पीपल्स को-ऑपरेटिव्ह बँकेच्या पेरुगेट शाखा व यंत्र निर्माण पतसंस्था यांच्याकडून 31 लाखांचे कर्ज मिळविले असल्याचे पोलीस तपासात समोर आले आहे. त्यामुळे आणखीही इतर बँकांना आरोपी समीर मोहिते याने फसविले असण्याची शक्यता पोलिसांनी वर्तविली आहे.
बनावट दस्त कोठे व कसे बनविले? समीर मोहिते याने जांभूळवाडी येथील एका भूखंडाचे बनावट दस्त तयार करून बँकांची फसवणूक केली आहे. मात्र भूखंडाची बनावट कागदपत्रे कोठून व कसे तयार केली ही बाब अजून उघड झालेली नाही. आरोपी समीर मोहिते यास बनावट दस्त तयार करून देणाऱ्यांचा शोध घेतला जाणार असल्याची माहिती हवेली पोलिस ठाण्याचे पोलिस निरीक्षक सदाशिव शेलार यांनी दिली आहे.
(संपादन : सागर डी. शेलार)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.