पुणे : वसतिगृहातील खोलीत झोपेत असलेल्या विद्यार्थ्याच्या अंगावर ॲसिडसदृश रसायन फेकल्याची घटना रेंजहिल्स भागात घडली. या प्रकरणी खडकी पोलिस ठाण्यात गुन्हा दाखल करण्यात आला आहे. या प्रकरणी आशिषकुमार नरेंद्रकुमार दास (वय २४, रा. सिंबायोसिस मुलांचे वसतिगृह, रेंजहिल्स) याने खडकी पोलिस ठाण्यात फिर्याद दिली आहे. त्यानुसार अज्ञात आरोपीविरुद्ध गुन्हा दाखल करण्यात आला आहे.

तक्रारदार विद्यार्थी रेंजहिल्स परिसरातील सिंबायोसिस मुलांच्या वसतिगृहात राहतो. तो शनिवारी (ता. २३) रात्री खोलीत झोपला होता. त्यावेळी रात्री साडेआठच्या सुमारास एकजण वसतिगृहातील खोलीत शिरला. त्याने प्लास्टिकच्या मगमध्ये ॲसिडसदृश रसायन भरून आशिषकुमारच्या अंगावर फेकले. शरीराचा दाह झाल्यामुळे आशिषकुमारने आरडाओरडा करीत दरवाजा उघडण्याचा प्रयत्न केला. तेव्हा खोलीच्या दरवाजाला बाहेरून कडी लावलेली होती.

या घटनेची माहिती मिळताच सहाय्यक पोलिस आयुक्त आरती बनसोडे, वरिष्ठ पोलिस निरीक्षक गिरीशकुमार दिघावकर यांनी घटनास्थळी धाव घेतली. पोलिसांनी वसतिगृहातील सीसीटीव्ही चित्रीकरण ताब्यात घेतले आहे. वसतिगृहातील एखाद्या विद्यार्थ्याने खोडसाळपणा केल्याचा संशय पोलिसांनी व्यक्त केला आहे. पुढील तपास सहाय्यक पोलिस निरीक्षक रुईकर करीत आहेत.