पुणे : महाराष्ट्र राज्य माध्यमिक व उच्च माध्यमिक शिक्षण मंडळासह सीबीएसई, आयसीएसई बोर्डाचा बारावीचा निकाल जाहीर झाल्यामुळे उच्च शिक्षण देणाऱ्या शहरातील नामांकित महाविद्यालयांनी प्रथम वर्षाच्या प्रवेश प्रक्रियेला सुरवात केली आहे. महाविद्यालयांच्या अधिकृत संकेतस्थळावर शुक्रवारपासूनच विद्यार्थ्यांना ऑनलाइन प्रवेश अर्ज भरता येणार असल्याची महाविद्यालयांकडून देण्यात आली आहे.
बारावीचा निकाल जाहीर झाला असला तरी कोरोनामुळे वैद्यकीय व अभियांत्रिकी अभ्यासक्रमासह इतर व्यवसायिक अभ्यासक्रमांच्या प्रवेश पूर्व परीक्षेसंदर्भात अध्याप कोणतीही स्पष्टता सरकारकडून देण्यात आलेली नाही. त्यामुळे व्यावसायिक अभ्यासक्रमाला प्रवेश घेऊ इच्छिणाऱ्या विद्यार्थ्यांना आणखी काही काळ प्रतीक्षा करावी लागणार आहे. तसेच दरवर्षी मोठ्या संख्येने उच्च शिक्षणासाठी विद्येच्या माहेर घर असणाऱ्या पुण्यात बाहेर गावाहून, परराज्यातून येणाऱ्या विद्यार्थ्यांची संख्या कोरोनाच्या पार्श्वभूमीमुळे यंदा लक्षणीयरित्या घटण्याची शक्यता नाकारता येत नाही.
सावित्रीबाई फुले पुणे विद्यापीठाशी संलग्न असणाऱ्या पुणे, अहमदनगर आणि नाशिक या तीन जिल्ह्यांमध्ये वाणिज्य शाखेच्या प्रवेशासाठी सुमारे ५० ते ५५ हजार जागा उपलब्ध आहेत. त्यातील सुमारे ३० ते ३५ हजार जागा पुणे जिल्ह्यासाठी ११ ते १२ हजार जागा नाशिक जिल्ह्यासाठी आणि सुमारे ६ हजार जागा अहमदनगर जिल्ह्यासाठी आहेत. त्याचप्रमाणे विज्ञान शाखेसाठी तीनही जिल्ह्यांसाठी जवळपास ३२ हजार जागा उपलब्ध आहेत.
"बारावीचा निकाल जाहीर झाल्यामुळे शुक्रवारपासूनच (ता. १७) प्रथम वर्षाच्या प्रवेशाबाबतची माहिती महाविद्यालयाच्या संकेतस्थळावर प्रसिद्ध केली जाणार आहे. विद्यार्थ्यांना प्रवेश अर्ज भरता येतील," असे सर परशुरामभाऊ महाविद्यालयाचे प्राचार्य डॉ. दिलीप शेठ यांनी सांगितले.
मॉर्डन महाविद्यालयाचे प्राचार्य डॉ. राजेंद्र झुंजारराव म्हणाले, "बारावीचा निकाल जाहीर झाल्यानंतर गुरुवारी लगेचच महाविद्यालयाच्या संकेतस्थळावर प्रवेश प्रक्रिया संदर्भातील माहिती प्रसिद्ध केली आहे. विद्यार्थ्यांना अर्ज भरण्यासाठी जुलै अखेरपर्यंत मुदत दिली आहे. पंधरा दिवसांचा कालावधी देण्यात आला आहे."
- पुण्याच्या बातम्या वाचण्यासाठी येथे ► क्लिक करा
(Edited by : Ashish N. Kadam)
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.