पिंपरी - महापालिकेच्या शिक्षण विभागाने तब्बल नऊ महिन्यांनंतर तत्परता दाखवीत नेहरूनगरमधील भांडारातून हजारो बाकं उचलले आहेत. संबंधित पुरवठाधारकाने मागणीनुसार शाळांवर बाक पोच करण्यास अखेर सुरुवात केली. ‘हजारो बाक धूळ खात’ या मथळ्याखाली ‘सकाळ’मध्ये वृत्त प्रसिद्ध झाले होते. त्याची दखल घेऊन प्रशासनासह पुरवठादाराला जाग आली आहे.

ताज्या बातम्यांसाठी डाऊनलोड करा ई-सकाळचे ऍप

महापालिकेच्या भांडार विभागाने काही महिन्यांपूर्वी ७१ लाख ४० हजारांची सुमारे एक हजार १६० शालेय बाक खरेदी केले. त्यानंतर हे बाक शाळांमध्ये पोच करण्याऐवजी नऊ महिन्यांपासून पूर्वीच्या नेहरूनगर मध्यवर्ती भांडार विभागात धूळ खात पडून होते. अनेक शाळांमधील वर्गांचा आकार लहान आहे. तेथे बाकांची गरज नसल्याचे मुख्याध्यापकांनी प्रशासनाला कळविले होते. तरी खरेदी करण्यात आली होती.

याविषयी ‘सकाळ’मध्ये वृत्त प्रसिद्ध झाल्यावर भांडार विभाग आणि शिक्षण विभागाने हालचाल केली. संबंधित पुरवठाधारकाला बोलावून घेतले. त्याला मागणीनुसार शाळांवर बाकवाटप करण्यास सांगितले. शिक्षण विभागानेही आडेवेढे न घेता नेहरूनगरच्या भांडारपाल रवींद्र शीलवंत यांच्या डिमांड चलन, मागणी तक्ता व शाळांची यादी पाठवली. त्यानंतर सकाळीच बाक उचलण्यास सुरुवात केली. शीलवंत म्हणाले, ‘‘जोपर्यंत शिक्षण विभागाकडून मागणी चलन येत नाही, तोवर आम्ही गोदामात आलेले साहित्य हलवू शकत नाही.’’

पाणीपुरीवाली आजी सोशल मीडियावर व्हायरल (व्हिडिओ)​

दरम्यान, ना पुरवठाधारकाने बाक वाटप केले, ना प्रशासनाने, तरीदेखील संबंधितांचे बिल पास केले. त्यामुळे महापालिकेच्या तिजोरीत लाखो रुपयांचे नुकसान झाल्याचे याप्रकरणी सखोल चौकशी करून संबंधित दोषी अधिकारी, ठेकेदारांवर कडक कारवाई करावी, अशी तक्रार दीपक खैरनार यांनी आयुक्त श्रावण हर्डीकर यांच्याकडे केली आहे.