नारायणगाव (पुणे) : राज्यातील तमाशा फडमालक व कलावंत यांच्या आर्थिक व इतर समस्यांकडे राज्य सरकारचे लक्ष वेधण्यासाठी 21 सप्टेंबर रोजी नारायणगाव (ता. जुन्नर) येथील तमाशा पंढरीत विठाबाई नारायणगावकर यांच्या पुतळ्यासमोर महाराष्ट्र राज्य तमाशा फडमालक कलावंत मंडळाच्या वतीने एक दिवसाचे लाक्षणिक उपोषण करण्याचा निर्णय घेण्यात आला आहे.
- पुण्याच्या बातम्या वाचण्यासाठी येथे ► क्लिक करा
याबाबत महाराष्ट्र राज्य तमाशा फडमालक कलावंत मंडळाचे अध्यक्ष व ज्येष्ठ तमाशा फडमालक रघुवीर खेडकर यांनी माहिती दिली की, राज्यात तंबूचे व हंगामी असे सुमारे 130 फडमालक व साडेचार हजार कलावंत आहेत. कोरोनामुळे मार्च महिन्यात लॉकडाउनचा निर्णय घेण्यात आल्याने यात्रा- जत्रांचे कार्यक्रम रद्द झाले. त्यामुळे तमाशाचे कार्यक्रमही रद्द झाले. फडमालकांचा पूर्ण हंगाम वाया गेला. दरवर्षी विजयादशमीच्या मुहूर्तावर तंबूच्या तमाशासाठी अकरा फडमालक राज्याचा दौरा करून व्यवसाय करतात. यात्रा- जत्रांचा हंगाम व तंबूचे तमाशे यावर फडमालकांचे आर्थिक चक्र सुरू राहते.
मागील वर्षी तमाशाचे कार्यक्रम रद्द झाले. त्यामुळे फडमालक कर्जबाजारी झाले असून, फडमालक व कलावंत यांच्यावर उपासमारीची वेळ आली आहे. उदरनिर्वाह करण्यासाठी फडमालक व कलावंत यांना आर्थिक मदत करावी, अशी मागणी राज्यातील विविध संघटनांनी राज्य सरकारकडे निवेदनाद्वारे केली होती. मात्र, अद्यापही सरकारने याकडे लक्ष दिले नाही.
कोरोना संकट वाढत असल्याने या वर्षीसुद्धा विजयादशमीच्या मुहूर्तावर तंबूच्या तमाशाचे कार्यक्रम होण्याची शक्यता नाही. कर्जबाजारीपणामुळे फडमालक चिंतेत आहेत. फडमालक व कलावंत यांच्या समस्यांकडे राज्य सरकारचे लक्ष वेधण्यासाठी खेडकर यांच्या नेतृत्वाखाली विठाबाई नारायणगावकर यांचे पुत्र व फडमालक कैलास, कन्या मालती इनामदार, नातू विशाल, महाराष्ट्र राज्य तमाशा फड मालक कलावंत विकास मंडळाचे सचिव मुसाभाई इनामदार, उपाध्यक्ष राजू बागुल, संजय महाडीक, शांताबाई संक्रापूरकर हे एक दिवसाचे लाक्षणिक उपोषण करणार आहेत.
तमाशा कलावंतांचे प्रश्‍न व मागण्या
- राज्यात 130 फडमालक व साडेचार हजार कलावंत
- ११ फडमालकांवर सुमारे नऊ कोटी रुपयांचे कर्ज
- कोरोनामुळे फडमालक व कलावंत यांच्यावर उपासमारीची वेळ
- सरकारने फडमालक व कलावंत यांना आर्थिक मदत करावी
राज्यात तंबूचे तमाशे करणारे अकरा जेष्ठ फडमालक आहेत. ते सुमारे दोन हजार कलावंत, चालक, बिगारी यांचा उदरनिर्वाह करण्याचे काम करतात. हंगाम वाया गेल्याने अकरा तंबूच्या फडमालकावर सुमारे नऊ कोटी रुपयांचे कर्ज झाले आहे.
- रघुवीर खेडकर
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.